Goizeko bederatzietan eman zitzaion hain egun bereziari hasiera. Adarraren soinuari eta txalapartaren hotsari erantzunez ehunka larrabetzuar gerturatu ziren Askatasunaren enparatzan, Larrabetzuko plazan, jarritako karpan egin zen hasiera-ekitaldira. Etxahun Lekueren bertsoak eta Bizkargi dantza-taldearen agurra jaso eta gero, 100 urteko Libe Asua eta 16 urteko Iñaki Elgezabal botoa ematera joan ziren. Lehenbizikoak izan ziren. Haien atzetik joan zen, ekitaldian irakurritako adierazpen hunkigarrian esan zuten bezala, “herri oso bat, zer izan gura duen ebatziko zuen herri bat”.
Hasiera-hasieratik ilara luze xamarrak eratu ziren hauteslekuaren atarian. Toti Martinez de Lezea eta Etxahun Lekue ere izan ziren bozkatzen lehenengoetarikoak. Han zituzten, zain, hainbat eta hainbat hedabide, euren artean TV3 Kataluniako telebista publikoa. Eta barruan, hauteskunde-mahaietako kideak, jarraipen zein berme batzordeetako kideak eta begiraleak, tartean Laura Mintegi eta Paul Rios.
Gaztelumendi Abesbatzaren emanaldiaren ostean, eguerdiko ordu batean, etorri zen eguneko bigarren momentu hunkigarria, Txori-martxan parte hartu zuten txorierritarrekin batera, apirilean eta maiatzean galdeketa egingo duten Bizkaiko herrietako –gehi Legutio eta Urkabustaizeko–, ordezkariak plazara sartu zirenean, adarren soinuaz lagunduta. Horrez gain, Larrabetzun bezala egun horretan galdeketa egiten ari ziren Astigarraga, Hernani, Oarsoaldea eta Tolosaldeako ordezkarien ahotsa entzun ahal izan zen bozgorailutik. Horren ostean, musika ibiltariak eta talo eta ogitarteko usainak hartu zituen Larrabetzuko plaza eta kaleak, eta ipuin-kontalaria eta herri-kirolen tartea heldu zenerako, paseak ziren “ebaztera” bozka ematera deitutako larrabetzuarren erdia baino apur bat gehiago.
Arratsaldean parte-hartzea moteldu egin zen, baina eten bako egitaraua aurrera zihoan heinean, plaza, karpa eta karpa ingurua betetzen joan ziren, Bizkargi dantza-taldearen erakustaldiarekin lehenengo, eta Geurea, eskubidea musika emanaldiarekin geroago: Etxahun Lekue, Fredi Paia, Leire Bilbao, Rafa Rueda, Keu Agirretxea, Mikel Etxaburu eta Josu Zabala.
Ilundiko zortzietan, hauteskunde-mahaiak ixtearekin batera, emaitzarekiko ikusmina areagotzen eta giroa berotzen joan zen; emozioa sumatzen zen denen aurpegietan. Zortzi eta erdiak pasatxo ziren atzera ere adarrak eta txalapartak emaitzak bazeudela iragarriz jendea karpara deitu zutenean. Sentimenduak bor-bor eta barrea aurpegietan igo zen oholtza gainera talde sustatzailea eta eskutik oratuta eman zituzten emaitzak. Emozioak gainezka egin zuen eta malko bat baino gehiago isuri zen bai oholtza gainean, bai behean, egun historikoari amaiera eman zion Malen Amenabarren agur-bertsoarekin.
EUSKAL ESTATU BURUJABE BATEKO HERRITARRA IZAN GURA DUZU?
HAUTESLE-ERROLDA: 1.585
BOTOAK: 919
BAI: 866
EZ: 31
ZURIAK: 1
BALIOGABEAK: 21