Larrabetzuko Udalak Gaztelumendiko gurutzea botako du

Aikor aldizkaria 2017ko api. 27a, 14:01

Larrabetzuko Udaleko udalbatzak aho batez onartu duen bezala, Gaztelumendi mendian dagoen gurutzea lurrera botako dute. Oraindik ez dute noiz egingo duten zehaztu, baina maitzerako edo ekainerako egitea espero dute. Erabaki hori azaltzeko, udalekoek arrazoi bi aipatu dituzte: batetik, gurutzea erortze arriskuan dagoela; bestetik, monumentuak duen sinbologia. Bere lekuan, ohorezko plaka bat eta monolito bat jarriko dituzte, “askatasunaren alde eta faxismoaren kontra borrokatu eta hildako borrokalariak omendu eta gogoratzeko”, esan du Udalak ohar batean.

Gaztelumendi mendia 1936ko Gudan Bilbo defendatzeko egindako “Burdin Hesia”ren barruan zegoen kokatua. 1937ko ekainaren 12an frankistek hesia apurtu zuten eta hurrengo egunean, Larrabetzu okupatu zuten. Handik hilabete batzuetara, frankistek Gaztelumendi tontorrean harrizko eta hormigoizko gurutze bat eraikitzeko agindua eman zuten, euren armadako hildakoak omentzeko. Monumentua 1938an inauguratu zen.

 

36ko Gerra gogoan

Bestalde, laurogei urte bete dira tropa faxistak Larrabetzun sartu zirela eta efemeridearen haritik ekitaldiak antolatu dituzte maiatzerako. Horrela, hilaren 5ean, “36ko Gerra” gazteei zuzendutako hitzaldia eskainiko da 17:00etan, Hori Bai gaztetxean. Anguleri Kultur Etxean, hiru film emango dira: Las 13 rosas, hilaren 11n (hizlaria, Iratxe Fresneda); La voz dormida, hilaren 19an (hizlaria, Toti Martinez de Lezea); eta La mujer del anarquista, hilaren 25ean (hizlaria, Bego Vicario). Filmak 19:30ean izango dira. Azkenik, maiatzaren 26an musika kontzertua egongo da Andra Mari elizan, 19:30ean, Larrabetzuko Musika Eskolaren eskutik.

Bestalde, Bizkargi Eguna dela-eta, maiatzaren 3an eta 7an ere ekitaldiak egingo dituzte Burdin Hesia edo Cinturón de Hierro defendatzen hil ziren gudarien omenez.

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).