Larrabetzuko Oroimen Historikoaren lantaldeak bultzatuta, sei plaka ipini dira plaza inguruko hainbat eraikinetan. Faxistak 1937ko ekainaren 13an sartu ziren Larrabetzura, eta plaka horietan geroago herrian izandako gertakizunak jasotzen dituzten argazkiak erreproduzitu dira, “larrabetzuarrek eta bisitariek gertatu zenaren berri izan dezaten”.

Dantza-taldeak Erandio lana aurkeztuko du urriaren 7an, 19:00etan, Euskadi plazan, Erandiogoikoan. Azaldu dutenez, euskal dantzak, musika eta antzezpena uztartuko dituzte egitasmoan, “folklorea, kultura, euskara eta gure herriaren historia sustatzeko helburuarekin”. Ikuskizunean 200 bat lagunek hartuko dute parte: dantzariek eta dantzari ohiek, musikariek, herritarrek, Musika Eskolak, Erandioko Musika Bandak, Erandioko Lagunak abesbatzak eta tenor batek.