Txakolinaren eguna 18. aldiz egingo dute domekan, ekainak 2, Hilario Astorki plazan. Azoka 11:00etatik 17:00etara izango da, eta plazan 36 saltoki ipiniko dira. Besteak beste, nekazaritzako produktu hauek egongo dira ikusgai eta erosgai: eztia, gazta, ogia, euskal pastela, barazkiak, loreak eta kontserbak. Gainera, goiz osoan zehar Bizkaiko Txakolinaren 2018ko uzta dastatzeko aukera egongo da herriko bost upeltegiren eskutik: Garkalde, Magalarte, Basalbeiti, Erdikoetxe eta Larrabe. Kopak eta tiketak udal postuan ipiniko dira salgai.
Asteburuan, eta Bizkaiko Foru Aldundiak antolatuta, Kirol Jaia egingo da gure lurraldeko 35 udalerritan; haien artean, Sondika, Derio eta Zamudio daude. Udalerri horiek kiroldegiak eta kirolari lotutako beste gune batzuk zabalduko dituzte doan, herritarrak kirola egitera animatzeko.
Los árboles mueren de pie antzezlana (Alejandro Casona). Ekainaren 1ean eta 2an, 19:00etan, Gurea Aretoan. Udalak eta Sutondoan elkarteak antolatua.