Gunea edo BiziPuntoa margo urdinez seinaleztatuta dago eta, argibide grafikoez gainera, hurrengo tresna hauek ditu: bihurkinak, giltza ingelesa, giltza finkoak, allen giltzak, pneumatikoak puzteko eskuzko sistema eta bizikleta finkatzeko besoak. Gainera, QR kode bat erabilita badago tutorialak kontsultatzeko aukera.
Gunea Bizkaiko Foru Aldundiak atondu du. Lezamako Udalak esan duenez, erakunde biak elkarlanean aritu dira, udalaren asmoa izan baita herritarren eta zehazki Zorribike elkartearen eskaerei erantzutea. “Alde batetik, lezamarren proposamenak eta nahiak gauzatzen jarraitu nahi ditugu, eta bestetik, mugikortasun iraunkorra eta kirola egitea sustatu”, aipatu du Jon Ander Aurrekoetxea alkateak. “Txirrindularitza-kultura handia du Lezamak eta oso pozik gaude herritarrei zein gure herritik egunero bizikletaz pasatzen dutenei erraztasunak emateaz”.