Jaureguik diseinu abstraktua egin du plazarako. “Zerrendek eta biribilek osatutako diseinua da. Elementu sinpleak dira, baina erritmoa ekartzen diote zoladurari. Derioko Udalak eskatuta, plazaren izena gehitu dugu, eta diseinuaren parte bihurtu”. Kolore gorria eta zuria erabili ditu diseinuan. “Ez nituen kolore asko erabili nahi, epe luzera nekagarriak direlako. Kolore bakarra edo bi kolore erabiltzen direnean, inpaktua handiagoa da epe luzera eta ez da hain nekagarria. Kolore zuriak argitasuna ekartzen du, eta gorriak, tenperatura bisuala”. Aipatu moduan, ibilgailuak ibiltzen dira San Migel plazan, eta horregatik asko zaindu da materialen kalitatea. “Irristatzeen eta lizunen kontrako materialak aukeratu dira, plazako alderdirik txarrenei erantzuna emateko”.
Egilearen esanetan, xedea izan da plazaren pertzepzio positiboa zabaltzea. “Batez ere eraikinetako bizilagunek ikusiko dute egindakoa. Nolanahi ere, jatorrizko diseinuan eserleku batzuk ere bazeuden, eta, San Migel jaiei begira, ipini eta kendu daitezkeen lorontzi handiak. Udalak elementu horiek jartzeko aukera aztertzen dabil”.