Gurean egoerarik erosoena aurkitu du bizitzeko eta hazteko: Txorierriko errepide zaharretik, korridoretik zein trenbidetik lehen begiradan erraz sumatu dezakegu landare horren hedapena, zonalde handiak bete ditu eta. Normalean, sakan artean eta lanek birrindutako lur-eremuetan zabaltzen hasten da, eta gero, astiro, baina gelditu gabe, gainerako landare-espezieak bizi diren eremuetara sartzen hasten da, ertzetatik bihotzeraino.
Landarea erauzteko proba arrakastatsuak egin dira berton zein Asturiasen eta Kantabrian, eta hartara badakigu zer egin behar den soluzio-bidean jartzeko: informazio-kanpainak egin, Aldundien laguntzak udalen bitartez bideratu eta hurrengo urteetako jarraipena lur-jabeekin adostu.
Esaten denez, edozein kolonizazioz konturatu orduko berandu izaten da konponbidea bilatzeko, baina, agian, oraindik garaiz egon gintezke gure paisaia eta ekosistemak beren horretan izateko.