Sarasolak antzerki-testuak idatzi ohi ditu, baina oraingo honetan narrazioan saiatuko da. Buruan baditu istorioaren nondik norakoak. “Fikziozko pertsonaia Larrabetzura itzuliko da eta bere bidez aztertuko dira herrian egon diren aldaketak”. Egileak herriko bazterrak eta jendea ezagutu ditu inspirazio bila. “Sorpresa izan da kalean topatutako giroa: oso herri bizia da eta komunitate-kutsu indartsua du. Baserri asko ditu, eta handiak, eta aztertu beharreko balioak ere bai: burdinolak, errotak, uria… Badu zer ikusi eta zer ikasi; mahiko mami”.
Egileak oso positibotzat jo du Geuretik Sortuak egitasmoa. “Jendea sortzera bultzatzen du, eta Euskal Herriko mundu txiki horien denboraren joan-etorriaren eraginez gertatzen diren aldaketak literaturaren bidez uzten dira agerian”. Lesakarra abuztuan itzuliko da Larrabetzura bere istorioan sakontzen jarraitzeko.