Eusko Jaurlaritzak gomendioak zabaldu ditu bero handiari aurre egiteko. Batez ere hauek babestu behar dira: adinekoak eta lau urtetik beherako umeak; haurdunak eta bularra ematen dabiltzan emakumeak; gaixo kronikoak; autonomia mugatua duten lagunak; eta aire zabalean lan egiten duten pertsonak. Tenperatura handiek deshidratazioa sor dezakete, hau da, ur gehiegi eta elektrolitoak izerdia botatzeagatik galtzea. Hori ekiditeko, egarri izan baino lehen, ura eta likidoak sarritan edatea da gomendagarria. Gainera, ez da kafeina, alkohola eta azukre asko duten edariak hartu behar, ezta janari koipetsuak ere. Euren ordez, komeni da entsalada, fruta eta barazkiak jatea.
Tenperatura handiaren beste kalte bat intsolazioa edo bero-kolpea izan daiteke, hots, gorputzaren tenperatura egokitzeko sistemak huts egitea. Buruko mina, zorabioa, goragalea, sukarra eta nekea horren sintomak dira; kasu larrienetan, baita konbultsioak, portaera-aldaketak eta kontzientziaren asaldura ere bai. Horiek azaltzen badira, 112 zerbitzura berehala deitu behar da. Intsolaziorik ez izateko, Eusko Jaurlaritzak jarraibideak eman ditu: aire zabalean, eguzkitan ez jarri eta jartzen bagara, eguzkiarengandik babestu kapela jantzita, arropa arina erabili eta ariketa fisiko handirik ez egin; eta barrualdean, ez erabili beroa sortzen duten makinarik, haizagailuak piztu eta noizbehinka freskatu burua eta eskuak urarekin.