Prentsa-oharrean azpimarratu moduan, Aretxabaletaren herenaitona, Nikolas Aretxabaleta, Zamudioko alkatea izan zen duela urte asko. “Atzera begiratzen dudanean eta gure herriaren historia ikusten dudanean, gogoan ditut gaur egungo Zamudio egiteko gogor lan egin duten pertsona guztiak. Izan ere, Zamudiok modu jasangarrian batzen ditu kultura, tradizioa, teknologia eta berrikuntza, eta horrek erreferente bihurtu du Bizkaian zein Euskadin”. Aretxabaletaren ustez, uztartze hori eta herritarren parte-hartzea “giltzarriak dira udal-azpiegiturak eta -zerbitzuak hobetzen jarraitzeko eta, hortaz, herritarren bizi-kalitatea hobetzeko”.
Igotz Lópezen lekukoa hartuko du Aretxabaletak. “Ilusio eta erantzukizun handiz aurre egingo diot Igotzen lekua hartzeko erronkari. Izan ere, aztarna handia utziko du gure herrian. Kultura zinegotzi moduan azken urteak bere ondoan partekatu izana etengabeko ikaskuntza izan da”.
Magalarte Zamudioko upategiaren seigarren belaunaldikoa da Aretxabaleta. Salmenten eta Merkataritza Espazioen Kudeaketako eta Administrazio eta Finantzetako goi-mailako teknikaria da eta gaur egun Enpresen eta Administrazio eta Zuzendaritzako gradua egiten dabil. Horrezaz gainera, familiako upategia zuzentzen du; kultura zinegotzia da, eta Zamudio-Derioko Nekazaritza eta Abeltzaintza Kooperatibako idazkaria. Txikitatik parte hartu du herriko hainbat kultura-taldeetan eta elkarteetan.