Herritar-talde batek Derio Bizirik auzo-elkartea sortu du, eta Hiri Antolamenduko Plan Orokorrean (HAPO) jasotako bi egitasmo posibleren aurka antolatzen hasi dira. Jakinarazi duten moduan, alde batetik, baliteke Ganbe Bekoan industrialde berria egitea; eta beste alde batetik, 1.300 etxebizitza baino gehiago eraikitzeak ekarri lezakeela zenbait etxe desjabetzea. Esther Apraiz alkateak, bestalde, lasai egoteko deia egin die herritarrei, “dokumentua aurrerakina delako eta bertan jasotakoa ez delako nahitaez hasierako onarpenaren fasera eramango”.

Espainiako Gobernuko Nekazaritza, Arrantza eta Elikadura Ministerioak lizitaziora atera ditu Bilbao eta Derio lotzen dituen Lezamako Trenbide Zaharreko bide naturala berreskuratzeko lanak. Egitasmoaren balio estimatua 6,7 milioi eurokoa da eta lanak bi urteko epean egitea aurreikusi da. Txorierriko txirrindularitza- eta mendizale-elkarteek eta herritarrek urte luzeak daramatzate bidea berreskuratzeko eskatzen, eta hainbat ekintza antolatu dituzte horretarako, hala nola bidea eta tunela ezagutzeko irteerak eta ingurua garbitzeko auzolanak; hainbat urteren ostean, badirudi proiektua gauzatuko dela.