Jacob Bridges zuzendariak hainbat film ospetsu egin zituen Hollywooden: Jarri Potea, Eraztunen zalduna, Gabonzaharraren aurreko amesgaiztoa... Hacendado markako arrrakastak, baina arrakastak, azken batean. Oso gutxik dakite bere benetako izena Jagoba Puentes dela eta bilbotarra dela. Duela 15 urte, Puentes desagertu zen, baina ez zitzaion inori axola, Willy zinemaren areto-zainari izan ezik. Willy laguntza bila dabil, bere laguna topatzeko. Horixe da Cine Abandonado ihes-gelaren abiapuntua. Escape roometan lagun talde bat itxita gelditzen da, eta handik ateratzeko hainbat jolas eta enigma gainditu behar dira.
"Aretoak oinarri bi ditu: batetik, zinema, Aitor eta biok oso zinemazaleak garelako; eta bestetik, umorea, Cine Abandonadoren ezaugarririk bereziena. Boca Beatsen mamia begi-bistan dago aretoan. Normalean areto horiek beldurrezkoak dira; gurea, berriz, umorezkoa. Escape roomak iragartzen dituzten webguneetan ez dago ‘umorea’ etiketarik, gurea definitzeko. Hori bera gertatzen zitzaigun Bocabeats taldea martxan jarri genuenean: Ez dugu etiketa garbirik, ez Bocabeatsek, ez gelak. Eta horrek bereiztu egiten gaitu”, esan digu Ivan Perezek.
“Guztiok pasatzen dugu ondo. Aitorrek edo nik jolasa gidatzen dugu eta Bocabeatsek saioa duenean, aktore batek egiten du. Polita da gidaria parte-hartzaileekin aritzea, jolasaren beste osagai bat izango balitz moduan. Gela 75 minutuan amaitzen da, baina denbora luzeagoa ere eman dezakezu barruan. Bezeroak poz-pozik ateratzen dira. Lehenengo asteburuetan erabat beteta izan dugu eta denetariko lagunak etorri zaizkigu: emakume nagusiak, familiak, lagun-taldeak, escape room zaleak... Eta norberaren ezaugarrien arabera, egokitzen dugu ibilaldia. Esperientzia polita da, ñabardurak zaintzen ditugulako: argia, kea, giroa, hormetako apainketak... Gauza pila bat Derion erosi ditugu”.
“Esperientzia polita da, ñabardurak zaintzen ditugulako: argia, kea, giroa, hormetako apainketak...”
Ihes-gela urrian ireki zuten, baina aurretik urtebete eman zuten lanean. “Aretoa irekitzeko ideia bagenuen aspalditik, baina oso lanpetuta geunden. Pandemia etorri baino lehen, gure momenturik onena zen, baina 2020ko martxoan, guztiok moduan, etxean gelditu behar izan genuen. Eta aprobetxatu genuen ihes-gela aurrera ateratzeko”. Azken hilabeteotan ez dira bakarrik ibili, familiek izugarrizko laguntza eskaini dietelako. “Aita eta anaia ingeniariak dira eta haiek diseinatu zituzten mekanismo batzuk, lan-plana ezarri, planoak margotu... Hasi baino lehen, nik ez nekien ezta zulatzeko makina bat jasotzen ere. Eta azkenean, orduak eta orduak eman eta gero, gure artean apaindu dugu dena”.
Atzerapena
Udarako gela ia prest zegoen, baina hori irekitzea atzeratu behar izan zen, Bocabeatsek udan hainbat saio eskaini dituelako, “inoiz baino gehiago”. Hala ere, Perezek atzerapenaren alde ona azpimarratu du. “Udan probak egiten ibili ginen, azken batean, ikuskizuna bezalako baita: ikusi behar duzu jendeak nola hartzen duen. Eta lagunak-eta etorri ziren ibilaldia egitera eta jolasak egitera. Horri esker, escape rooma biribiltzeko aukera izan genuen”.
Ihes-gela ez dago Txorierrin, Bilbon, Begoña auzoan, bazik. “Lokala zoragarria da eta Bilbon jende gehiago erakarri ahal duzu”. Euskal Herrian hainbat ihes-gela daude eta Bartzelonaren atzetik, onenak bertan omen ditugu. “Esate baterako, Gasteizen Europako escape roomik onena dago. Asko ditugu bai, baina ez dugu elkar lehiakidetzat hartzen. Lehia ona da, lagun batek ihes-gela batean ondo pasatzen badu, beste batera joateko gogoa izango duelako. Eta hainbat eta hainbat areto egoteak exijentzia-maila igotzen du: gaur egun, escape room onak filmak bezalakoak dira”.
Informazio gehiago:
escaperoombilbao.com
622 062 738