Saretzen elkartearekin eta Adintsuen Elkartearekin batera, Lezamako Udalak elkartasun-zozketa bat antolatu zuen herriko familia behartsuei egoera ekonomikoa arintzen laguntzeko. Bi sari egon dira: alde batetik, Athleticeko jokalariek sinatutako 2021eko Superkopako finaleko baloia; eta bestetik, Athleticeko  elastikoa eta bisera eta Athleticek eta Errealak jokatutako Errege Kopako Finaleko bufanda oroigarria, Saretzen elkartearen eskutik. Zozketan parte hartzeko txartelak euro batean saldu ziren eta orotara 1.100 euro batu dira.   

Lezamako Udalak 2.644.635 euroko aurrekontua onartu du 2021erako, iaz baino % 11 gutxiago, “COVID-19ak ekarri baitu diru-sarrerek eta Udalkutxaren ekarpenak behera egitea; azken hori % 12 gutxitu da”, azaldu dute prentsa-ohar baten bidez. Nolanahi ere, udalak ziurtatu du herritarren ongizatearen aldeko apustua egiten jarraituko duela eta 250.000 eurotik gora bideratuko dituela gizarte-zerbitzuetara eta pertsonen eta establezimenduen beharrizanak betetzen laguntzera.