Mark Twainen Yankee bat Arturo Erregearen Gortean eleberrian, protagonista eguzki eklipse batez baliatuko da estualdi batetik ihes egiteko. Hortik aurrera denboran atzera bidaiatu duen XIX. mendeko Hank Morganek, bere zientzia eta teknologia ezagutzak aprobetxatuko ditu Arturoren aholkulari nagusi bilakatzeko, eta Merlin aztia zokoratzeko. Egile irudimentsuaren fruitua kasu horretan, badira baina horrelako fenomeno astronomikoz aprobetxatu diren hezur-haragizko pertsonaiak.

Txundituta uzten naute Napoleonen garaiko batailek, non uniforme koloretsuak dituzten soldaduek, lerro paraleloetan eta aurpegira begira, tiro desarrak botatzen dituzten elkarri liturgia hilgarrian. Lehen Mundu Gerrako metrailetek, taktika horiekin amaitu zuten, eta nahiz eta gerrara doazen gixajoak betikoak izan, egun, armadek kolpeen hartu emana ekiditen dute aire zein komando ekintza kirurgikoagoen mesedetan. Teorian, norberaren bajak gutxiago izango dira, beraz, lortutako helburuak salgarriagoak, komunikabide eta sareak ere bataila eremu baitira. Ah! Eta, bide batez, albo-kalteak ere, ustez, mugatuagoak.