Abereen etxaldea irakurri nuen ikastolan, eta Orwellez liluratuta 1984 ere irakurri nuen. Esan gabe doa bigarren liburua irakurtzea zailagoa egin zitzaidala, bai konplexuagoa zelako, bai irudikatzen zuen gizarteagatik: hor topatu nuen lehenengoz “anaia nagusia”. Azken egunotan, eztabaida sutsua piztu da Estatu Batuetan, Clearview aplikazioa dela eta. Aplikazio hori edonoren argazkia ateratzeko eta pertsona identifikatzeko gai omen da. Non dago gure pribatutasuna?

Inoiz egin dut, bale… Entzungailuak ipinita eta telefonoa eskuetan “Okei Google” esan dut ahopean; gero, ozenago…, eta askoz ere ozenago… Eta telefonoak erantzun egin dit. Jarraian, helbide bat esan dut eta Google Maps-en agertzen den ibilbideari jarraitu diot, niri so egon den jendeari saiheska begiratuta, lotsaren lotsaz. Geroz eta gauza gehiago egiteko gai dira adimen artifizial hauek; Appleen Siri, Amazonen Alexa, Microsoften Cortana, Movistarren Aura, Linuxen dabilen Mycroft edo besteren bat izan.