Loiuko udalbatzak lau milioi euroko aurrekontua onartu du 2020rako; % 7,8 gehiago, aurreko ekitaldiaren aldean. Josu Andoni Begoña Loiuko alkatearen esanetan, aurrekontu koherentea, orekatua eta kaudimenduna da, eta Agintaldiko Plana gauzatzea du helburu. Plan horren harira, 10 esparru estrategikotan, udalak 210 egitasmo aurrera eramateko asmoa du. Aurrekontua aho batez onetsi dute.

Josu Andoni Begoña Loiuko alkateak bere webgunean jakinarazi duenez, kiroldegia Zabaloetxeko pilotalekuaren ondoan eraikiko da, azpiegitura hori aprobetxatzeko eta kostuak gutxitzeko. Kiroldegiak hiru gune edukiko ditu: fitness-aretoa, spinning-a egiteko gunea eta hainbat kirol egin ahal izateko erabilera anitzeko aretoa, hala nola pilatesa, aerobic-a eta body conbat-a.