“Profesionala izan nahi dut”

Zelan hasi zinen palan jokatzen?

Txikitan esku pilotan jokatzen nuen. Hala ere, 13-14 urte nituela, Larrabetzuko frontoian, Asier del Rio ikusi nuen palan jokatzen. Niretzat erabat berria zen eta horrek palan jokatzeko gogoa piz­tu zidan. Beraz, esku-pilota utzi eta palan hasi nin­tzen.

Zelan izan zen aldaketa? Gogorra?

Palak eta esku-pilotak ez dute zer­ikusirik. Pilota beste era batean jo behar du­zu, esate baterako. Alde batetik, aldaketa erraza izan zen, Larrabetzun bertan egin nuelako eta klub berean, Olarretan. Bestetik, gogorra ere izan zen, lehenengo partidetan kirol zaila zela ikusi nuelako. 

Erraz moldatu zinen erremintara?

Hasieran paletarekin jokatzen nuen, arinagoa eta errazagoa delako, baina gaur egun pala laburra erabiltzen dut, askoz pisutsuagoa. Egokitzapen-prozesua behar da, bai. 

Olarretan hasi, baina gaur egun Ses­tao Lagun Artean taldean zabiltza. Zer­gatik aldaketa? 

Duela urte bi, Sestaotik deitu zidaten Espainiako Txapelketan parte hartzeko. Au­kera ezin zen alferrik galdu eta bat egin nuen Sestaoko taldearekin. Txapelketa jo­katu eta gero, bertan gelditzea erabaki nuen, Larrabetzukoa baino askoz handia­goa baita. 

Nora moldatzen zara hara joateko?

Aitarekin joaten naiz. Poz-pozik eroa­ten nau leku batetik bestera (kar-kar).

Zelan Sestaon?

Oso pozik. Laster frontoi berria izango dugu. Sestaoko klubak La­rrabetzukoak bai­no maila handiagoa du. Gainera, harreman ona dut klubekoekin. Astean behin joaten naiz hara entrenatzera eta, batzuetan, Miribillako frontoian ere saioak egiten ditut Pablo Fustoren agindupean. 

Norekin eta Pablo Fustorekin! Hau ohorea, ezta?   

Itzela da. Fusto historiako jokalaririk onenetarikoa da eta azken urteotan hain­bat saio egin dut berarekin. Horietan asko ikasi dut, Fusto jokalari ederra ez ezik, entrenatzaile paregabea ere badelako. Zure idoloekin hain harreman gertua izatea oso handia da. Adibide polita da niretzat.  

Zer hartzen duzu pala: zaletasuntzat ala ogibidetzat?  

Biak. Nik palan jokatzen dut dis­fru­tatzeko, baita lehian sartzeko eta ho­betzeko ere. Nik profesionala izan nahi dut. Munduan jokalari asko daude, baina profesionalak Bizkaian ditugu.

Horretarako txapelak irabazi behar dituzu eta horretan zabiltza, ezta? 

Bai, Trinkete Bizkaiko Txapelketa, Bizkai­Cup eta GRAVN txapelketak irabazi di­tut. Horrek eskarmentua eman dit, eta apurka-apurka pilotari hobea naizela uste dut. Ia ondo nabilen datozen urteotan eta 2026an Munduko Txapelketan parte hartzeko aukera dudan. Bilbon jokatuko da eta han parte hartzeko gogoa dut.

Txorierrin eta Larrabetzun, hain zuzen, badituzu ereduak: Roman Mal­donado eta Asier del Rio jokalari pro­fesionalak. Harremanik duzu haiekin?

Bai, biak ezagutzen ditut, baina batez ere Asierrekin egon naiz. Anaia nagusitzat dut. Hainbat aldiz entrenatu dut berarekin eta izugarri irakatsi dit. 

Olarreta ere badago herrian. Nolako garrantzia du taldeak zure ibilbidean?

Oso handia. Olarretakoak familiakoak dira. Erlantz Garcia entrenatzaile izan nuen bertan eta bera aita izan zen niretzat. Jokalariak eta entrenatzaileak la­gunak dira. Sestaon, lehen esan dudan mo­duan, oso gustura nabil, baina egia da go­goan ditudala Olarretan egindako en­trenamenduak, Er­lantz… 

Nolako jokalaria zara? Zein gusta­tzen zaizu?

Aurrelaria naiz eta tantoak bukatzea gustatzen zait. Partidetan apurka-apurka ibiltzen naiz, partidak aurrera egin ahala, errendimendua gero eta hobea dut. Pablo Fusto gustatzen zait, baina Gaubeka eta Imanol ere zoragarriak dira.