“Larrabetzuarron bizi-kalitatea hobetzen jarraitzeko herri-proiektua dugu”

Zergatik erabaki duzu alkatetzara berriro aurkeztea?

Zortzi urte daramatzat udalean, baina ko­ronabirusak bi urtez normaltasunez jar­dutea eragotzi zuen. Hori dela eta, ezin izan ditugu aurreikusitako proiektu ba­tzuk gauzatu, eta gustatuko litzaidake ho­riek hurrengo agintaldiaren lehenengo ur­teetan gauzatzea. Eta batez ere he­rri­kideek emandako babesagatik eta ani­moagatik erabaki dut berriro aurkez­tea. 

Zein da datozen lau urteetarako lan-ildo nagusia?

Azken 12 urteotako berbera: la­rra­be­tzuarron bizi-kalitatea hobetzea. Ho­rre­tarako, herritarrak izango di­ra pro­ta­go­nista, eta elkarlanean, auzokide­ekin, guz­tiok kezkatzen gaituzten gaietan sa­kon­duko dugu: osasuna, ingurumena, kul­tura, euskara, parekidetasuna, kirola…

Eta erronka nagusiak?

Erronka nagusietako bi nabarmen­tze­ko: etxebizitza eskuratzeari orain bai­no irtenbide merkeagoa ematea eta az­pie­gitura publikoak hobetzea. Gaz­teen­tzako laguntzak handituko di­tu­gu alo­kai­rurako, eta, alokabiderekin batera, hu­tsik dauden etxebizitzak alo­kai­ru-mer­ka­tura ateratzeko kanpaina abia­raziko du­gu. Hurrengo agintaldian, 3.250.000 eu­roko inbertsioa egingo du­gu: eskolako erai­kinean eta jolas-gu­nean atontze-la­nak; futbol-zelaiko alda­ge­lak eta lokal be­rriak; Errebale eta Gaz­telumendi ka­leak batzea; espaloi be­rria, Elexaldetik Gaz­te­lumendiko igoera­ren hasieraraino; lokal pu­bliko berriak, ludotekan eta Errebale jau­regian; eta udaletxearen birgaitze osoa. Azkenik, Aretxabalaganeko parke be­rria ipiniko dugu martxan, 18.500 me­tro karratu izango dituena.

Nolako lantaldea izango duzu on­doan?

EH Bilduk gaztetu du zerrenda. Gaine­ra, azpimarratzekoa da emakumeen pro­tagonismoa, zerrendako lehen zortzi ki­de­etatik zazpi emakumeak dira eta. De­nok bizi gara Larrabetzun, udalerriko erre­a­litate sozialean inplikatuta gaude eta herriko hainbat taldetan hartzen dugu par­te.

Nola baloratzen duzu azken agin­taldia?

Herri Programan agindutakoa bete dugu. Nabarmenduko nuke, besteak bes­te, 1.050.000 euro inbertitu ditugula erai­kin eta zerbitzu publikoak hobetzeko. Ekintzak ere antolatu ditugu euskararen eta herri-kulturaren alde, eta dirulaguntza berriak sustatu ditugu lehen sektoreari laguntzeko eta gazteei etxebizitzaren alo­kairua ordaintzen laguntzeko. Era berean, herriko gazte sortzaileentzako beka sortu dugu. Larrabetzu Bizkaibuseko 2. tarifa-eremuan sartzea lortu dugu Garraioa Irau­li elkartearekin batera, eta eraso sexisten kon­trako udal-protokolo berria egin du­gu Zutunik! talde feministarekin eta he­rritarrekin elkarlanean.  

Karguaz jabetuz gero, zer egingo duzu lehenik?

Ez naiz originala izango: proposamenez ha­rago, aurrekoetan esandakoa esaten ja­rraituko dut, eta herritar guztien alde lan egiteko konpromisoa berretsi, azken zor­tzi urteetan bezala. Nirekin batera uda­la osatuko duten zinegotzi guztiak ere kon­pro­miso berarekin arituko dira; ez izan du­darik. Guk gobernatuta, udaletxeak he­rri­ko etxea izaten jarraituko du.