Lezamako arazo nagusia da etxebizitza babesturik ez egotea, herritar gehienen ustez

Lezamako Udalak hala eskatuta, Gizaker enpresak inkesta egin die 18 urtetik 55 urtera bitarteko 400 lezamarrei, euren kezkak eta udal-kudeaketari buruz duten iritzia ezagutzeko. Beste gai batzuen artean, inkestatuei etxebizitzari buruz galdetu zaie. Inkestatuen % 33,5ek uste du Lezamako gaur egungo arazo nagusia dela etxebizitza babesturik ez egotea. Bestalde, inkestatuen % 15,3k lehen etxebizitza eskuratzeko beharra du, eta ehuneko horren % 75,4k Lezaman bizitzen jarraitzeko asmoa du.

Lehen etxebizitza eskuratzeko beharra dutenen % 65,6 etxebizitza bilatzen dabil eta, inkestan jaso den moduan, nahiko lukete etxebizitza hori 61-90 metro koadrokoa izatea (% 60,7) eta hiru logela (% 55,8). Era berean, inkestatuen % 29,5ek eraikuntza berriko etxebizitza nahiago du, baina gehienek uste dute berdin diola eraikin berria den ala ez. Etxea erosi behar dutenen % 68,9k adierazi du babes publikoko etxebizitza jabetzan eskuratzeko asmoa, eta % 9,8k alokairuan.  

Nabarmendu dutenez, inkestatuen % 61ek ez ditu ezagutzen babes-etxebizitzen motak, ezta horiek eskuratzeko baldintzak ere. Horri dagokienez, % 93 azaldu da udalak giari buruzko informazioa osatu eta bidaltzearen alde. Azkenik, % 97,3k egokitzat hartzen du Babes Publikoko Etxebizitzan interesa dutenen erregistroa egitea, eta % 90,8k uste du lezamarrek lehentasuna izan behar dutela etxebizitza horiek emateko orduan.

Udalak jakinarazi duenez, emaitzak kontuan hartuta, diagnostiko bat egingo du eta hori ibilbide-orri moduan erabiliko du “Lezaman Babes Publikoko Etxebizitzak eraikitzeko aukerak dakarren prozesu luzean aurrera egiten jarraitzeko”. Beste aldetik, gogora ekarri behar da herriko zenbait elkartek eta herritarrek Etorkizuna Eraikitzen etxebizitzaren aldeko plataforma osatu zutela iaz eta euren aldarrikapen nagusia dela herrian jabetzarako edo alokairurako etxebizitzak eraikitzea.    

Lezamarrek aipatutako beste arazo batzuk hauek dira: dendarik ez egotea (% 14,8), girorik ez egotea (% 9,5), zerbitzurik eza (% 8,3) eta garraio publikoa (% 7).  Nolanahi ere, inkestatu gehienak pozik agertu dira udalerriarekin eta 10 puntutatik 8.06 puntu eman diote. Inkesta osoa hemen kontsultatu daiteke .  

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).