Ostalaritzan, beste irizpide batzuk sartu dira indarrean: pandemiaren aurreko ordutegia berreskuratu egin da, tabernaren barruan zutik jateko eta edateko aukera dago... “Barraren esparrua berreskuratzea zoragarria da: barrak giro polita sortzen du, harreman zuzenagoa duzu bezeroarekin, tabernaren edukiera handitu egiten du....”, esan digu Maite Zamudioko Amairu tabernaren jabeak. “Azken hilabeteotan kostatu egin zaigu araudi berrira egokitzea eta orain ere denbora beharko dugu, baina pozik gaude”, adierazi du tabernariak. Bere esanetan, jendeak gorriak ikusi ditu, askok enplegu-espediente erregulazioak izan dituztelako, eta “hori gertatzen denean, ez diozu jateari uzten, tabernara joateari baizik”.
Maite baikor agertu da, “gehienok txertoa hartu dugulako”. “Maskara luzaroan jantzi beharko dugu, baina aurrera goaz eta lan egiteko gogoa dugu”. Bezeroak ere pozik azaldu dira LABIk hartutako neurriekin. “Lehen ondo geunden, mahaietan eserita; eta hemendik aurrera ere ibiliko gara gustura, barran. Nik ez dut tabernan maskara kenduko eta, ahal izanez gero, kanpoan hartuko dut edaria, baina barran egotea ere pozgarria da”, aipatu digu bezero batek.
Baserri Antzokia
Gorka Urrutia eta Janire Alfonso Baserri Antzokiko tabernaren jabeak, ordea, ez dira hain baikorrak. Lege berria ezarri eta astebete beranduago egin dugu berba eurekin eta, haien esanetan, aldaketa handirik ez dute sumatu. "Askotan esaten da jendea oraindik beldur dela, baina gure bezeroak, batez ere gazteak, ez dira beldur. Hala ere, ohitura aldatu egin behar izango dute: pandemian gauzak era batean egin behar izan dira: maskara, gela, edukiera, talde-kopurua eta ordutegia mugatua, edaria jezarrita hartu...", aipatu dute.
Orain, aldiz, muga asko desagertu egin dira eta egoera berrira egokitzeko denbora beharko da. "Adibide bat jarriko dizut: legea arindu eta astebe beranduago, kontzertu bat antolatu genuen eta bakarrik 15 lagun etorri ziren hori zuzenean ikustera. Eta guk dakigula, Bilboko Kafe Antzokian gauza antzeko bat gertatu da azken egunotan. Murrizketak zeudenean, itxaropentsu agertzen ginen etorkizunari begira. Pentsatzen genuen jendeak irteteko gogoa izango zuela. Hala ere, gaur egun ez dugu hain argi ikusten".
IZ ile-apaindegia
Ile-apaindegia abenduaren 2018an ireki zen eta negozioa erabat finkatuta ez zegoela pandemia etorri zen. “Pandemia gogorra izan da, batez ere ezer ez genekielako: zelan jokatu, zelango segurtasun-neurriak ezarri.... Guztiok moduan, segurtasun-neurriak ezarri genituen eta horien aurrean jendeak oso jarrera ona adierazi zuen. Egia da batik bat nagusiak beldur izan direla, baina apurka-apurka ikara gainditzen dabiltza; bezero fidelak ditugu”, esan digu Ixone Zabala jabeak. Ile-apaindegian denetariko bezeroak hartzen dituzte: gazteak eta nagusiak, emakumezkoak eta gizonezkoak. Ohiko zerbitzuak eskaintzen zaizkie: ilea moztu, kolorea eman, tratamenduak... Estetika tratamenduak ere ematen dituzte.
Neurriak arindu egin dira, eta hori “pozgarria” da, Zabalaren esanetan, baina lan egiteko era ez dute gehiegi ile-apaindegi horretan aldatu. Hala ere, jendea “lasaiago” hurbiltzen da IZra. “Bezeroak sarriago etortzen dira. Gainera, ekitaldi bereziak berriro jarri dira martxan eta horiek ere ekartzen digute onura: jaun-hartzeak, ezkontzak... Ondo ikusten dut etorkizuna, jendeak kalera irteteko gogoa du, eta horretarako txukuntzeko joera du. Argia ikusten da tunelean, hor urrunean".