Hiru kategoria zehaztu dira adinaren arabera. Lehen Hezkuntzako 5. eta 6. mailetako ikasleek Derrigorrezko Bigarren Hizkuntzara (DBH) pasatzeak dakartzan emozioak, hizkuntza-ohiturak eta egoera berriak islatu beharko dituzte euren sormen-lanetan, “izan ere, arnasgune gehienak udalerri txikiak dira eta bertako ikasleek inguruko ikastetxe handiagoetara joan behar izaten dute DBHko ikasketak egitera”, azaldu dute antolatzaileek. Lanak formatu librean egin ahalko dira, hala nola marrazkia, bertsoa, poema, bideoa eta abestia.
Bestalde, DBHko 1. eta 2. mailetako ikasleek bideo-tutorial bat egin beharko dute youtuber estiloan, Julen Portillo euskal tiktokerraren bideoa eredu dutela. Bukatzeko, DBHko 3. eta 4. mailetako ikasleek elkarrizketa formatuko bideo batean erantzun beharko diete Hiru Damatxo ekoiztetxeak egindako galderei. Abiapuntuko materiala zein lehiaketaren oinarriak www.arnasgara.eus webgunean daude.
Lehiaketak 2.000 euro banatuko ditu saritan: 500 euroko saria emango da kategoria bakoitzeko eta publikoaren saria ere emango da. Sariak trukatu beharko dira Irrisarri Land abentura-parkean, Durango Azokaren denda birtualean edo Goazen! edo Irabazi arte! telesailen merchandisinga erosita. Sariak urriaren 28an banatuko dira Villabonan.
UEMAk, Eusko Jaurlaritzak eta Nafarroako Gobernuak elkarrekin sustatutako egitasmoa da Arnasa Gara, eta euskararen arnasguneen garrantzia jendearen artean zabaltzea, euskararen biziberritzeari eta euskararen herriari egiten dieten ekarpena nabarmenduz.