Euren hitzetan, “herriko eragile zein instituzioekin elkarlana ezinbestekoa da, gure herria indarkeria matxistatik askatzen jarraitzeko”. Horregatik, herriko eragileak gonbidatu dituzte aurkezpenera, hala nola, kirol-, kultura- eta gizarte-taldeak, alderdi politikoak, udalaren gobernu-batzordea, gizarte-langilea, udaltzainak, Osakidetzako langileak, eskualdeko talde feministak eta berdintasun-teknikaria. Ekintzan parte hartzea baieztatu behar da zgprotokolo@gmail.com helbide elektronikora idatzita.
Beste alde batetik, Zamudiok talde feministak antolatuta, maiatzaren 16an, 19:00etan “Malestares de género” hitzaldia izango da Zamudiotorren. Hitzaldia Maitena Monroyk egingo du eta bertan azalduko du emakumeen ondoeza eta gaixotasunak ere desberdinkeriatik artatzen direla. Azkenik, jakinarazi dute aurten ere jai-batzordeak puntu morea ipiniko duela herriko jaietan (maiatzak 20-27) eta hura Eraikiz kolektiboak kudeatuko du. “Guk puntu beltzak seinalatu, eta brigada feminista sortuko dugu. Eraso matxistarik edo sexistarik egonez gero, 633 196 014 telefono-zenbakira deitu ahalko da; telefono-zenbakia gau osoan zehar egongo da martxan”.