Sorkunde Landeta da Zapata Gorriak taldeko kideetako bat, eta egitasmoaren nondik norakoak azaldu dizkigu. “Ia urte osoan ibili gara emakumeak elkarrizketatzen eta informazioa biltzen. Bi helburu izan ditugu: alde batetik, bideo-emanaldi bat egitea, martxoaren 7an egin zena; eta bestetik, Zamudioko emakumeen ibilbidea egituratzea”. Zamudioko emakumeen ibilbideak hurrengo leku hauetan ditu geldialdiak: Leizaola plazan, udaletxean, Zamudiotorren, Lagunandre elkartearen lokalaren aurrean, Zamarripa plazan, Artetxenen, Bidekoetxe parkean, Lehendakari Agirre kalean eta Kultura Etxean. Leku horietan ipinitako paneletako QR-ak irakurrita, 26 emakume zamudioztarren historia irakurri eta en-tzun daiteke, euskaraz eta gaztelaniaz. “Haien papera azpimarratu nahi dugu, lehen mailako protagonistak izan direlako eta orain ere badirelako”.
Ibilbidea eginez, Zamudioko historia eraiki duten emakumeetako batzuk ezagutzeko aukera dago: Zamudio leinuko XVI. mendeko emakumea, antzinako arropa-garbitzaileak, bendejereak, lantegietan ibilitako lehen emakumeak, migranteei ostatua ematen zietenak, jostunak, gaur egungo kirolariak eta dantzariak, metalgintzako langilea eta herrian ezkondu diren lehen bollerak, batzuk aipatzearren. “Badakigu guztiak ez daudela, baina bai lehen pausoa egin dutenak, eta hori azpimarratzekoa eta eskertzekoa da. Guztiak dira adibide guretzat, eta haien irakaspena eta esperientzia erreferentetzat ditugu. Ahaztezin bihurtu dira gure herriko memorian eta emakume-izaeran. Zorte handia dugu euren historia partekatzeko prest agertu direlako, eta esan nahi diegu parekidetasunaren aldeko borroka honetan, borroka feministan, ikur direla”.
Esan moduan, ibilbideko emakumeek egin duten, eta egiten dabiltzan, lanaren balioa kalkulaezina da parekidetasunerako bidean. “Haiek dira gure protagonistak, gure erreferenteak”, Hala ere, emakumeak diren heinean, egitasmoaren sustatzaileek badakite eguneko lana ez dela lantegian, dendan, ospitalean edo eskolan bukatzen. Etxeko lanak eta zaintza-lanak gure gain daude oraindik. Gizarte-eredua aldatzen denean, hau da, patriarkatua desegiten dugunean, lortuko dugu berdintasuna, eta lan horretan gizonek eta emakumeok du gu ardura”.