Beñat Bergado antzerki eskolako beteranoetarikoa da. Hamalau urte ditu eta zabaldu zenetik darama Kukuken, zazpi urte hain zuzen ere. “Antzeztea gustatzen zait eta oso pozik nago eskolan. Urte hauetan hainbat gai jorratu ditugu antzezlanetan eta orain gai serioagoak lantzen ditugu, esate baterako alkohola, matxismoa edo bulling-a”. Bere esanetan, ez da ezaugarri berezirik eduki behar eszenatokira igotzeko. “Edonork egin dezake”. Antzerki eskolan ibiltzea lotsa kentzeko baliagarria dela esan digu, eta imajinazioa lantzeko. “Horregatik animatuko nituzke gazte guztiak Kukuken izena ematera”. Orain arte antzeztutako pertsonaien artean gogokoena aukeratzeko eskatu diogu, eta aukeratu ezin duela erantzun digu, guzti-guztiak dituela gogoko. Antzerkigintza hobbytzat du, eta Derioko antzerki eskolan luze ematea espero du.
Urko Marinak, berriz, argi dauka zein den gehien gustatu zaion papera: Olentzero antzezlanean egindakoa. Egia esan, ikuskizun bitan baino ez du parte hartu, eskolan aurtengo ikasturtean hasi delako. Zazpi urte ditu eta izugarri gustatzen zaio mozorrotu eta hainbat pertsonaia antzeztea. “Oso ondo pasatzen dugu. Jolastu egiten dugu eta gure burua grabatu ere egiten dugu, gero pantaila handian ikusteko, eta txarto dagoena zuzentzeko. Batzuetan barregura ematen digu”.
Olatz Urutxurtu Urkoren ama da eta aipatu digu eskertzekoa dela Txorierrin halako jarduera bat egin ahal izatea. “Izan ere, kirola edo dantza ez bada, aukera gutxi daukagu berton”. Bere esanetan, Urko izaera zabaleko mutikoa izan da beti, lotsarik ez duena eta besteekin komunikatzeko arazorik ere ez duena. Bere saltsan dago mozorrotu eta eszenatokira igotzen denean. Beraz, Kukukeri esker aurrera eraman dezake bere zaletasun handienetariko bat. Besteak dantza eta musika dira. Olatzek zalantza barik aholkatuko zenieke gainontzeko gurasoei seme-alabak antzerki eskolara eroatera. “Balioak lantzen dituzte, eta euskaraz”.
Helburu pedagogikoa
Iritzi berekoa da Beñaten ama, Elena Fernandez. “Are gehiago, nire ustez, antzerkigintza irakaskuntza arautuaren barruan egon beharko litzateke. Beñatentzat lagungarria izan da gorputzezko komunikazioa zein hitzezko komunikazioa hobetzeko, testuak ulertzeko, beste pertsona batzuekin harremanak izateko…”. Era berean, hasiera-hasieratik gustatu zitzaion Kukuken azaldutako metodologia eta lan egiteko era. “Helburua ez delako seme-alabek ikasturte amaieran antzezlan bat egitea eta guk txalotzea; helburu pedagogikoa da”. Beñatek urterik urte eman du izena eskolan, “berak nahi izan duelako. Semea oso pozik dago; eta ni ere bai”.
Kukuke antzerki eskola ilusio handiz sortu eta mamitzen joan da, eta gaur egun erreferente bihurtu da Derion zein Txorierrin. Urtero emanaldi bi eskaintzen dituzte, bata Derion bertan, eta bestea Bilboko antzerki jardunaldietan. Hurrengoa ekainaren 13an, 18:00etan, eskainiko dute Baserri Antzokian. Etorkizunari begira badituzte hiru erronka: hazten jarraitzea, erreferente izaten segitzea eta ikasleen adin-tartea zabaltzea.
Izena ematea
Aurrematrikula: ekainaren 5etik 16ra arte
Matrikula: irailaren 11tik 22ra arte
Adina: 4 urtetik 16 urtera bitarteko neska-mutilak, talde bitan banatuta: 4 urtetik 9 urtera; 10 urtetik 16 urtera.