“Zentzuzko erabakia da, bizi dugun errealitatearekin bat datorrena, eta haren bidez derioztarrek jasaten duten presio fiskala minimizatu nahi dugu. Jakin badakigu Covid-19aren pandemiaren ondorioz krisi ekonomikoa pairatzen ari garela, eta, horregatik, uste dugu ez dela Derioko familiei eta enpresei ahalegin ekonomikoak eskatzeko unea. Halaber, zergadunei ematen zaizkien zerga-onurak eta ordaintzeko erraztasunak mantenduko ditugu", adierazi du Esther Apraiz Derioko alkateak. Era berean, Apraizen hitzetan, “udalaren finantza-egoera onbideratuta dago, eta aurreko ekitaldietan udal-kutxan egin den kudeaketa arduratsuari eta zorrotzari esker, udala prest dago bere ibilbide-orrian ezarritako erronka nagusiei aurre egiteko”. Hala ere, gogorarazi du krisiak administrazioan ere duela eragina, eta, bereziki, tokiko administrazioetan, non diru-sarrera arruntek nekez konpentsatzen dituzten gastuak.
Besteak beste, udal-zerga hauek izoztuko dira: Ondasun Higiezinen gaineko Zergak (OHZ), Ibilgailuen gaineko Zergak (TMIZ) edo Jarduera Ekonomikoen gaineko Zergak (JEZ), eta zabor-bilketari, estolderiari, hilerriari eta jardueren irekiei lotutakoak.
Gobernu-taldeak esandakoaren arabera, 2021eko aurrekontuak aurrera ateratzea erronka handia izango da, zeren eta, Udalkutxatik jasotzen diren tokiko diru-sarreren beherakada dela eta, datorren urtean udalaren diru-sarreren beherakada oso handia aurreikusten baita, aurtengoaren antzekoa. COVID-19aren krisiaren ondorioz, aurten, “Deriok 453.000 euro gutxiago jasoko ditu Udalkutxa udal-finantzaketarako foru funtsetik, % 20ko murrizketa gutxi gorabehera. Diru-sarreren murrizketa horri Udalkutxako 2019ko likidazio positibotik datozen 130.000 euroak gehitu beharko litzaizkioke, aurten ere udalak ez baititu jasoko”.
Bestalde, azaldu duten moduan, COVID-19agatik kiroldegiko instalazioa itxi behar izanak eta udako igerilekuaren zerbitzuan izandako murrizketak (irekitze-egunak, edukiera…), Derioko Udal Kiroldegiko diru-sarrerak nabarmen murriztu dituzte. Itxierak eragindako galera ekonomikoen zenbatespen eta datuak honako hauek dira: abonatuei egindako itzulketak (itxitako egunen zati proportzionala): 52.440,15 euro; eta ikastaro eta alokairuengatik egin ez diren diru-sarrerak (4 hilabete, abuztuan instalazioa itxi zen): 42.000 euro. “Diru-sarrerak nabarmen jaisteaz gain, pandemiaren garaian, udalak krisiak eragindako ustekabeko gastuei egin behar izan die aurre. Abuztuaren 31ra arte udalak 112.327 euro inbertitu ditu, merkataritza, ostalaritza edo zerbitzuak bezalako sektoreak biziberritzeko neurrietan, baita udal-instalazioetan prebentzio neurriak jartzeko, espazio publikoen garbiketak egiteko, udaltzaingoari behar duen materiala errazteko... ere. Zenbateko hori ez zegoen aurreikusita urte hasieran, 2020ko aurrekontuetan”.
Adierazi dutenez, egoera honen aurrean, udalak 2020ko aurrekontuak egokitu eta lehentasunak ezarri behar izan ditu. “Udalak pertsonei eta haien ongizateri begira ahaleginak egiten jarraituko du, eta horregatik mantentzen dira gizarte-partida guztiak, hala nola, Gizarte Larrialdietarako Laguntzak edo Etxez Etxeko Laguntza Zerbitzua, elkarteentzako eta klubentzako diru-laguntza guztiak, kolektibo kalteberenentzako laguntzak, tupper solidario zerbitzua, elikagaien bankua... Derio ez da gelditu pandemian zehar eta martxan jarraitzen du. Azken hilabeteetan, esate baterako, Unbe eta Uribe kaleak berrurbanizatu ditugu. Aurreikusita genituen inbertsio eta proiektuen alde egiten jarraituko dugu. Baina, batez ere, premia sozial larrienei lehentasuna ematen jarraituko dugu, eta ahal den neurrian, tokiko ekonomia suspertzen lagunduko dugu, bereziki ostalaritzan, merkataritzan eta zerbitzuetan”.