Talde berria, ilusio berriak. Zer da La Topadora?
Noski, talde berri batean sartzen zarenean, ilusioz gainezka zabiltza: musika egin, zabaldu eta jendearengana iristearen ilusioarekin. Zer da La Topadora? Bost musikariren ezinegonetik sortutako taldea da. Lagunak gara eta oso ilusionatuta gaude, munduko agertoki guztiak zapaltzeko irrikan gabiltza.
“Lagunak gara eta oso ilusionatuta gaude, munduko agertoki guztiak zapaltzeko irrikan gabiltza”
Diskoaren izena, Voy con todo, oso adierazgarria da. Gogotsu hasi zarete...
Ezinbestekoa da horrelako mugida batean sartzean dena ematea, bai. Berri Txarrak taldeak zioen bezala, “pasioa da hemen exijitzea zilegi den gutxieneko hori”. Beraz, voy con todo.
Izena bitxia da. Azalduko duzue jatorria?
"La topadora", La Skandalosa Tripulación talde argentinarraren abeslariak, Cebok, konposatutako kanta da. Vendettarekin Argentinatik egin genuen azken biran, talde zoragarri horrekin egin genuen topo eta sekulako giro ona sortu zen gure artean. Euska Herrira bueltatu ginenean, Cebo gaixotu zela esan ziguten, minbiziak jota. Eta handik gutxira zendu zen. Izugarrizko makilakada izan zen denontzako. Bere taldekideek ordenagailuan zeuzkan editatu gabeko kantak argitaratzea erabaki zuten, bere omenez disko bat egiteko. Vendettari, “La topadora” kantua grabatzera gonbidatu gintuzten, eta guk gogotsu grabatu genuen. Vendetta amaitutakoan, proiektu honentzako izen bila genbiltzala, bere omenez La Topadora jartzea bururatu zitzaigun.
Hainbat estilo jorratzen dituzue: rock, ska, erritmo latindarrak, runba... Zelan moldatzen zarete?
Beti gustatu izan zaigu hainbat estilo uztartzea. Gure ustez, nahasketa horiek taldearen musika aberastu egiten dute; beraz, gustuko ditugu.
“Egiten dugun estilo-nahasketak taldearen musika aberastu egiten dute; beraz, gustuko dugu”
Taldekideok Vendetta eta Skalariak taldeetatik zatozte. Zergatik aldatu? Ez da seguruagoa finkatuta dagoen talde batean jarraitzea?
Talde bakoitzak bere izaera eta bere ibilbidea du. Noski, guretzako erosoagoa izango zen Vendetta izenarekin jarraitzea, baina ez litzateke Vendetta izango, eta proiektu berria indargabetuko litzateke. Hortaz, indar hartu dugu eta beste mugida batean sartzea egokiagoa iruditu zaigu.
Uste duzue La Topadora taldeak Vendetta eta Skalariak taldeetako ibilbideari jarraitzen diola? Ala erabat ezberdina da? Zaleak berberak izango dira?
Hori ezin da inoiz jakin. Argi dugun gauza bakarra hauxe da: gure gustuko musika egingo dugula berriro, orain ere, mugarik gabe.
Kantaren bat ere euskaraz abestuko duzue, ezta?
Bai, lehenengo diskoan badugu abesti bat, Ernesto Prat idazleak idatzitako testuarekin. Ez dugu kanta gehiago euskaraz egitea baztertzen, zergatik ez? Lehen esan bezala, mugarik gabe!
Koronabirusaren krisia gainditzen gabiltza apurka-apurka. Garai ona, talde berria sortzeko?
Pandemiak guri bete-betean eman zigun muturrean. Lehendabiziko kontzertuan, 2020ko martxoaren ostegun batean, Bilboko Kafe Antzokia lehertu genuen eta hurrengo astean denok ginen etxean giltzapean. Udako aurkezpen bira zapuztu egin zitzaigun. Baina tira, gustuko bidean, maldarik ez!
Areto txiki eta ertainetatik zabiltza diskoa aurkezten. Musikarientzat, agertoki politak izango dira, publikoa gertu-gertu duzuelako, eta hori azken bolada honetan faltan botako duzuelako. Nolako harrera izan duzue?
Bai, polita da areto txikietan aritzea, baina ez publikoa eserita egonda. Ez dago gaizki, baina beraien izerdia sentitzeko gogoa ere badugu. Orain arteko kontzertuetan harrera oso ona izan dugu. Jendeari ahal zen heinean gozatzen ikusten zitzaion, eta guk ume txikiek bezala gozatu dugu. Gogoa dugu aurreko hilabeteetako Sarako edo Urruñako bezalako kontzertuak berriro bizitzeko: zutik, izerditan eta parranda bizian.
“Gogoa dugu aurreko hilabeteetako Sarako edo Urruñako bezalako kontzertuak berriro bizitzeko: zutik, izerditan eta parranda bizian”
Jendeak musika zuzenean entzuteko gogoa du? Ala apur bat beldurtuta dabil? Eta musikariok, nolako jarrera adierazten duzue?
Guztiok dugu amesgaizto hau atzean uzteko gogoa: normaltasunera bueltatzea, parrandan ibiltzea... Kartutxo asko ditugu pilatuta, erretzeko esperoan; eta erreko ditugu, bai.