Inter Movistar talde madrildarra munduko areto-futbol klubik onenetarikoa da. Estatuan, besteak beste, 23 Liga eta 16 Kopa irabazi ditu; eta nazioartean, sei aldiz lortu du Europako Kopa, eta bost, Mundukoa. Orain, babesleak hala esanda, urdinez janzten dute, baina normalean kamiseta berdea izaten da. Eta horregatik, makina berdea esaten zaio. Derion ere badugu areto-futbol taldea, Pozgarri, eta bere janzkera ere berdea da. Ez du Interrek beste liga irabazi, baina aurten 25 urte bete ditu. Eta ez da marka makala, ez horixe!
"Ez da erraza hainbeste urtetan aurrera egitea, ez. Lan handia egin behar da eta leku batetik eta bestera ibili", esan digu Unai Ezkurra klubaren presidenteak. Pozgarri taldea egitura sendoa da; guztira, bost taldek gehi eskolak osatzen dute kluba: lau gizonezkoak eta beste bat, emakumezkoa. Gizonezkoen talde bat gazte mailakoa da eta beste hirurak, senior kategoriakoak: A taldea Euskal Ligan dabil; B taldea, Lurraldeko Lehenengo Mailan; eta C taldea, Lurraldeko Lehenengo Mailan. Guztira, 60-70 jokalari eta beste 20 lagun inguru daude klubean: 14 teknikari, bost batzarkide eta beste laguntzaile bi. "Lagun-talde polita eta konprometitua osatu dugu".
"Kluba indartzeko, egitura sendoa izan behar du eta, horretarako, taldeak kategoria guztietan izan behar ditu, emakumezkoak barne". Pozgarrik 2006an sortu zuen emakumezkoen taldea, baina urte bi beranduago desagertu zen. Eta 2018an taldea berriro sortzeko aukera izan zuen. "Bilbo taldea Estatuko Lehenengo Mailara igo zen eta gu filialtzat hartu gintuen. Urte polita izan zen eta gaur egun Bilbok ez du gurekin jarraitzen, baina neskek bai, ordea. Talde gaztea da eta etorkizun oparoa du".
Unairen esanetan, klubak herriko babesa sentitzen du. "Batetik, udalak laguntza ematen digu: kiroldegia uzten digu, eta gure beharra handiago egin ahala, ordu gehiago eskaini digu; bestetik, merkatariek babes ekonomikoa ematen digute. Egitura sortzea erraza da, baina gero hori elikatu behar da eta horretarako dirua behar da: fitxak ordaindu behar dira, epaileak, jantziak, Federazioaren zigorrak...". Hori bat dator klubaren filosofiarekin. "Gu derioztarrak gara eta herrikoak dira gure partaide gehienak. Horrek harrotu egiten gaitu. Hirugarren zatia garrantzitsua da eta partiden ostean, poteoa egiten dugu herritik. Horrek nortasuna ematen dio taldeari".
"Partaide gehienok derioztarrak gara. Horrek harrotu egiten gaitu eta nortasuna ematen dio taldeari"
Eskola
Pozgarrik bide horri jarraitu nahi dio eta horretarako areto-futbol eskola indartu. Pandemiak kalte handia ekarri zien, eskola urte horretan bertan, 2020an, martxan jarri zutelako, baina apurka-apurka neska-mutilak dabiltza berreskuratzen. "Umeek primeran pasatzen dute gurekin. Inguruko eskoletara gutunak bidali dizkiegu, areto-futbolaren abantailen berri emateko: barruko kirola denez, jokalariak ez dira hotz eta ez dira inoiz bustitzen; halaber, jokalari guztiek hartzen dute parte. Eta hori ez da futbolean gertatzen, esate baterako, kirol federatuan, gutxienez. Gure kirolak marketinik eza du. Pozgarri taldea ezaguna da herrian, baina gurasoek ez dakite noraino heltzen den gure egitura. Kategoria altuenean jokatzen duen klub derioztarra gara, esate baterako, Derio futbol taldearena baino altuagoa da gurea".
Ezkurrak ia 20 urte daramatza taldean eta lekukoa atzetik datozenetako baten bati eman nahiko lioke. "Nekatuta nago eta jende berria sartzea onuragarria izango litzateke: ilusio berriak, ideia berriak...". Dena dela, baikortasunez begiratu dio etorkizunari. "Klubak hazten jarraitzea nahiko nuke. Eta egiturari eustea ez ezik handiagoa izatea ere gustatuko litzaidake".
Urteurrena
Pozgarrik 25 urte bete ditu aurten eta, hori ospatzeko, ekitaldiak antolatu dituzte lau epetan. "Lehenengoan, ekainean, kategoria guztietako taldeek (gizonezko talde seniorrak izan ezik) txapelketa batean hartu zuten parte. Bizkaiko hainbat talde etorri ziren, baita Castro talde ospetsua ere. Oso polita izan zen. Bigarrenean, irailean, beste txapelketa bat antolatu genuen senior kategorian. Han, Hegalariak eta Gipuzkoako Goierri taldea aritu ziren. Giputzak Hirugarren mailan daude. Partidak jokatu eta gero, herri paella antolatu genuen eta udalak oparitxoa eman zigun. Oso gustura egon ginen. Azkenik, abenduan, lagunarteko partidak egin nahi ditugu kategoria guztietan. Campus bat egitea ere gustatuko litzaiguke. Eta dena biribiltzeko, ekainean beste gauza bat antolatu nahi dugu, baina oraindik ezin dut ezer esan horren inguruan", esan du Unai Ezkurra presidenteak.