Politeknika Txorierrik 40 berrikuntza-proiektu baino gehiago garatu ditu TKgune programaren baitan

TKgune da Eusko Jaurlaritzako Hezkuntza Saileko Lanbide Heziketako (LH) Sailburuordetzaren programa, eta LHko ikastetxeek eta enpresek ezagutza partekatzea ahalbidetzen du. Hortaz, enpresa-sektoreari lotutako proiektuak egiten dira, berrikuntza garatuz eta sustatuz enpresa txiki eta ertainen (ETE) beharrizanei erantzuteko. Programa 2014-2015 ikasturtean ipini zen martxan eta Politeknika Txorierrik hasiera-hasieratik parte hartu du bertan. Harrezkero 40 berrikuntza- eta transferentzia-proiektuetan baino gehiagotan lan egin du Bizkaiko 30 ETErentzat baino gehiagorentzat.   

Azaldu dutenez, bere ezagutzari esker, Politeknika Txorierrik ETEak gidatu ditu bidean sortutako beharrizanetan. “Lankidetza horrek ekarri du enpresetako zerbitzuak eta prozesuak ezartzea eta hobetzea, gailentzen ari diren merkatuetan sartu daitezen”. Horri lotuta, nabarmentzekoa da Politeknika Txorierrik ikasketa guztietan proiektu-eskaintza zabala duela: Diseinua eta fabrikazio mekanikoa, Elektrizitatea eta elektronika, Ingurumen Hezkuntza eta Kontrola, Salmenten eta Merkataritza Esparruen Kudeaketa eta Marketina.

Pili Alonso da Ingurune Estrategikoetan Aplikatutako Berrikuntzako zuzendaria (Tknika). Bere esanetan, “ikastetxeak TKgune programan beharrezkoak diren zutabeak eraiki eta indartu ditu. Hortaz, garapen-aukerak handitu dira, eta TKgune sarea indartu”. Gainera, bost pertsonak osatutako taldea ipini dute proiektuen buruan, gune gehiago sortzeko eta ezagutza handitzeko. “Proiektu bakoitza erronka da ikastetxerako eta irakasleentzat, ETE bakoitzari merkatuko erantzunik onena eman ahal izateko, etengabe eguneratzen dabiltza eta. Jakintza berriak ikasgeletara ere eramaten dira, ikasleak merkatuan sortutako azken erronketan trebatzeko”, esan dute.  

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).