“Al borde films” ekoiztetxea Anak eta Paulak duela urte batzuk Kanarietara egindako bidaian hasi zen. Hara migrazio emozionalei buruzko lan bat egitera joan ziren. “Argi genuen dokumentalak egin nahi genituela, eta, proiektuak mugitzeko orduan, babes legala edukitzeko beharra ikusi genuen. Kooperatiba aukeratu genuen era juridikotzat, ekonomia sozialaren barruan egon nahi genuelako”.
Euren esanetan, dokumentalak istorioak era hurbil batean kontatzeko aukera ematen die, era introspektiboago batean, eta askatasuna, adierazteko eta komunikatzeko orduan. Nolanahi ere, dokumentalez gainera, denetariko lanak egiten dituzte, hala nola publizitate arlokoak, korporatiboak eta zineari lotutakoak. “Jaten ematen diguna arimarako diren lanekin uztartzen dugu, eta batzuetan arimarako ere diren lan korporatiboak egiteko zortea daukagu”.
Dokumental bat egiteko orduan, presarik ez edukitzea ezinbestekoa dela azaldu digute, eta gakoa ideia hozten ez uztean dagoela. “Osterantzean, lana bertan behera uzten duzulako. Orain, adibidez, oso dokumental ederra egiten gabiltza Zestoan, Euskal Herrian daukagun denbora-kontzeptuari buruz. Eta gelditzen bagara, apur bat hil egingo da. Izan ere, jendeak bere gauzekin jarraitzen du eta lanari arreta emateari uzten badiogu, zailagoa izango da hari berriro ekitea”. Egileen eta dokumentalaren protagonisten artean sortzen den lotura emozionala ere azpimarratu dute. “Fikzioa denean, filmatzea denbora-tarte zehatz batean egiten da, baina dokumental bat egiteko, urte bat, urte bi edo hiru urte eman ahal dituzu. Ondorioz, oso harreman estua sortzen da bertan parte hartzen duen jendearekin. Oso esperientzia bizia da”.
Dokumentalak egiteak badauka alde ona, pertsona bakar batek ere egin ditzake. Horrela, bada, Ana eta Paula ederto moldatzen dira elkarrekin lan egiten: bata kamerarekin, eta bestea soinuarekin; biak gidoiarekin eta zuzendaritzarekin. Baina lanaren gainontzeko fase guztiei ere heldu behar diete, eta badaude egoerak haiek bakarrik heldu ezin dietenak. Kasu horietan adituen laguntza behar dute. Ondorioz, finantzazio bila ibili behar dute. “Ekoiztetxe gazteontzat zaila da diru-laguntza publikoak lortzea, horiek ibilbide luzea daukatenei daudelako zuzenduta. Bidegabea da, Estatu mailan Almodovarren ekoiztetxearekin sartu ahal zarelako lehian. Guk orain arte egindako guztia guk geuk ekoiztu dugu beste lan batzuei esker. Hala ere, egia da sortzaile gazteei zuzendutako diru-laguntzak egon badaudela, baina banaka batzuk baino ez dira. Finantzazio pribatua lortzen ikasi behar dugu, beraz”.
Gogotsu
“Al borde films” ekoiztetxea gizarte-ekimeneko kooperatiba da. “REAS sarearen barruan gaude. Hori ekonomia alternatiboa eta solidarioaren sarea da, eta bat egiten dugu euren filosofiarekin. Gainera, sareko beste entitateen laguntza jasotzen dugu eta sinergiak sortu dira gure artean. Adibidez, entitate horietako batzuen kanpainak sustatzeko lanetan hartu dugu parte. Askatasuna daukagu sortzeko orduan eta gaiak gizarte arlokoak izaten dira. Pozik, horregatik”. Edozein saltsatan sartzen dira, baina aitortu digute jorratzea gehien gustatzen zaizkien gaiak abstraktoak direla. Gai abstraktoak, egunerokotasunean isla dutenak.
Proiektu piloa daukate hasita eta epe ertainera horiek bukatzea hartu dute helburutzat. Proiektuen artean, bi azpimarratu dituzte El aleteo de la mariposa eta Erlojua eta kukua. Era berean, REAS sarearen “La mar viene revuelta” kanpaina osatzen duten lau bideoetatik lehena aurkeztu berri dute. Interneten dauden plataforma webei esker, euren lanak bidali ahal dituzte hainbat festibaletara eta dagoeneko Bartzelona eta Kanarietako festibalean, eta Zinemaldian izan dira.
Azken urte bietako balantzea egin dute eta oso zaila izan dela aitortu digute, baina hala eta guztiz ere pozik eta gogotsu dabiltzala. Eta oso zorrotzak direla. “Xehetasunak erabat zaintzen ditugu eta oso gutxitan gaude % 100ean ados egin dugunarekin… Beno, hori da gure egiteko era, gero, emaitzetan isla duena”.
Hasieran aipatu moduan, ekoiztetxea berrasmatzeko momentuan daude Ana eta Paula. “Enpresa sortzen duzunean, zurea baino ez dakizu egiten eta gauza pilo bat ikasi behar duzu: dokumentalak zelan finantzatu, horiek zelan mugitu, marketin estrategia zelan egin… Eta izugarria da batzuetan. Hori dela-eta, ezin izan ditugu ekoiztetxearen oinarriak ondo finkatu eta uste dugu hori egiteko momentua dela. Era berean, gure lan baldintzak ahalik eta duinenak izatea lortu behar dugu, eta disfrutatzeko uneak atera. Eta hori oso korapilatsua da negozioa zurea denean. Ekoiztetxearen irudia ere berrikusi nahi dugu… Dena dela, polita da zure burua etengabe berrasmatzea”.
Alborde films:
688 888 469
info@albordefilms.com
www.albordefilms.com