Zientzia? Bai, mesedez

Erabiltzailearen aurpegia

Iazko abenduko alean, nire iritzia eman nuen COVID-19aren txertoaren inguruan, zehazki txertoa jartzearen edo ez jartzearen erabakiaren inguruan. Garai hartan konfinatuta geunden eta txertaketa-prozesua hasi berria zen artean. Galdera asko zeuden argitu barik: Txertoa baliogarria izango litzateke? Euskal Herriko biztanleria osoak onartuko luke txertaketa? Noizko? Eta abar. Galdera horiek guztiak argitu dira, eta, gainera, modu positiboan.

Hau guzti hau posible izan da, txertoa sortzeko, oinarrizko zientzia erabili delako, ARN mezularian oinarritutako ikerketa hain zuzen. Katalin Kariko biokimikari hungariarrak 40 urtean etengabe ikertu du txertoak garatzeko teknika hori, 80eko hamarkadatik gaur egunera arte. Zailtasun izugarriak izan zituen 90eko hamarkadan, bere ikerketarako dirua lortzeko, inork ez baitzuen berarengan sinesten, eta ikerketa bertan behera uztea ere aztertu zuen. Hala ere, azkenean, Pensilvaniako Unibertsitateko fotokopiagailuan, Drew Weisman immunologoarekin egin zuen topo kasualitatez, eta horrek proposatu zion bere ARN teknika erabiltzea, hiesaren kontrako txertoa garatzeko. Ondoren, 2010. urtean,  Moderna eta BioNtech enpresek erosi zuten ikertzaile bien ARN mezulariaren patentea, eta orain badakigu oinarrizko zientziaren ikerketan urteetan “galdutako” denborak salbatu dituela milioika pertsona hiltzetik. Nolanahi ere, aipatu beharra dago ikerketa hori txertaketa-prozesuaren hasiera izan dela, behar-beharrezkoa, baina ez nahikoa; hau da: teknologia (zientzia aplikatua) eta garraioa ere beharrezkoak izan dira txertoa ekoizteko.  

Harritzekoa bada ere, urteetan etengabe ikertzen eta arazoak gainditzen ibili den zientzialari baten irmotasunak eta hura beste ikertzaile batekin topatu izanaren kasualitateak balio izan digute munduan izandako pandemiarik larriena ekiditeko. Oinarrizko zientzia, zientzia aplikatua eta teknologia behar-beharrezko ditugu gaur egungo erronkei aurre egiteko, eta, hortaz, herrialdeen urteko aurrekontuetan finantzazio egokia eta iraunkorra bermatu beharko litzateke gure ikertzaileentzat, liskar politikoetatik kanpo. Zientzia? Bai, mesedez.

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).