Kaixo, ChatGPT! Zer zara?

Erabiltzailearen aurpegia t: Xabier Diaz / a: www.www.aidetic.in 2023ko ots. 7a, 11:54

“Kaixo! I am an AI language model, so I do not have feelings or physical sensations. I am here to assist you with any information or questions you may have. How can I help you today?(1)”. Azken egunetan famatu egin den ChatGPT boot-ari euskaraz gal­detuz gero, hori da erantzuten duena. Euskarari buruz galdetuta, zeozer ulertzen duela erantzuten digu, baina gaztelaniaz edo ingelesez hobeto mintzatzen de­la; gainera, gehienetan gaztelaniaz eran­tzu­ten dio euskaraz egindako galderari.   

ChatGPT(2) da OpenAI enpresak gara­tutako adimen artifiziala erabiltzen duen txatboot bat; hau da, elkarrizketa ba­ti jarraitzeko gai den programa informa­tikoa. Baina kontua haratago doa, beste hainbat gauza egiteko ere gauza da eta. Hasteko, esparru zabal bateko informazioa bildu dezake, ezagutza orokorretik xehe­ta­sun tekniko zehatzetara. Pertsonaia his­toriko baten biografia idazteko eskatu diezaio­kegu, edo fusio energiaren in­gu­ru­ko txostena, funtsezko puntuak azpi­ma­rratzen duena. Itzulpenak egiteko ere gai da, eta bildutako informazioari na­hi dugun estiloa emateko ere eskatu diezaiokegu. Fusio nuklearraren ingu­ru­ko poema bat nahi duzu? Eskatu, eta egingo dizu. Antzerki-lantxo bat, Athleticen eta Errealaren arteko der­biaren ingurukoa? Eginda… 

Erantzunak emateko, ChatGPT-k adi­men artifiziala erabiltzen du. Lehenengo eta behin, galderak aztertzen ditu eta bildutako datuekin alderatzen ditu haiek ulertzeko. Jarraian, bildutako datuetatik abiatuta, jasotako erantzunen balorazioa kontuan hartuta eta adimen artifizialeko algoritmoak erabilita erantzuten du. Bes­tal­de, guk erantzunari buruz egiten du­gun balorazioa baliatzen du prozesua hobetzeko. 

 

Arriskuak

Aukerak itzelak dira, baina arriskuak ere bai. New Yorkeko Hizkuntza Sailak, adibidez, programa hau erabiltzea gala­razi diete ikasleei(3). Ezin dugu ahaztu, eman­dako datu eta erantzunetatik eli­ka­tzen denez, erabiltzaileen eragina izango duela; hau da, erabiltzaile ge­hienak zu­riak, ipar-amerikarrak eta erdi-mailako edo goi-mailako kla­se­koak badira, hori na­baria izango da eran­tzunetan.  

Froga batzuk egin ditut, eta ingelesez eta gaztelaniaz oso ondo moldatzen bada ere, ez saiatu, esaterako, Gabriel Arestiren biografiarekin: ingelesez, eus­karaz eta gaz­telaniaz galdetu diot, eta ez du behin ere jaioterriarekin asmatu… Lana neuk egin beharko dut, beraz.

 

 

 

 

(1) “Kaixo! Adimen Artifizialeko hizkuntza-eredua naiz; beraz, ez dut ez sentimendurik ez sentsazio fisikorik. Zuri laguntzeko nago edozein informazio edo galderaren bidez. Nola lagundu diezazuket gaur?”

(2) ChatGPT Wikipedia https://eu.wikipedia.org/wiki/ChatGPT

(3) Eskola digitalak sortzen duen lilura eta beldurra, Argia, Mikel Garcia,  https://blogak.argia.eus/mikel-garcia/

Teknologia

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).