Ibilbide bat Larrabetzun zehar

Uriko plaza - Bolunburu - Loroño - Alaio - Goikola - Uriko plaza Uriko plazatik irtengo gara Morgarako biderantz eta 40 metrotara dagoen bide gurutzean ezkerretara doan auzobidea hartuko dugu, Anguleri jauregia eskuinetara utzita. Ibilbidean aurkituko dugun lehen baserria Basagune da. Errepidea laga eta baserriaren atzealdeko gurpidera joko dugu. Metro gutxitara Basaguneko iturria eta labadero zaharra aurkituko ditugu. Haiek eskuinetara utzi eta aurrera joko dugu. Trokako bidegurutzean eskuinetara hartu behar dugu, handik 15 metrotara dagoen hurrengo gurutzean ezkerretara eta gora doan bidea hartzeko. Pinudian sartu gara. Ezkerretara egiten badugu, Burdin Gerrikoa edo ‘Cinturón de Hierro’ izeneko trintxera ikusiko dugu. Lehengo gurpidea hartuko dugu berriz ere gora egiteko, pinudia amaitu arte. Landara irten gara eta 25 metro gorago Bolunburuatze baserria aurkituko dugu. Baserriraino joango gara eta eskuinetara dugun ikuslekutik bai Goikoeleizalde, Alaio, Barrenetxe eta Erkinko auzuneak, bai Goikogane eta Bizkargi mendiak begiztatu ahal izango ditugu. Paisaiaz gozatu eta gero, gora egingo dugu, etxe gainaldeko munatik ezkerretara joanez, eskuinetara dagoen ereinotz handi baten albotik sakonean ikusten den hariztira abiatzeko. Hemendik ere, ikustaldi ederra dugu: Oiz, Anboto eta Gorbeia mendiak, besteak beste. Iparralderantz jarraituko dugu eskuinetara beresia dugula, Loroño auzuneko asfalto bidera irten arte. Loroñoko auzo bidetik Iparralderantz joanez gero Loroñobekora ailegatzen gara. Bideari jarraituz, Loroñogoikora helduko gara. Berriro ere, iparralderantz jarraituko dugu lehen bidegurutzeraino, eta pinudian behera eskuineko gurpidea hartuko dugu Larra baserriraino. Orain, etxetzarretik iparralderantz doan gurpidea hartuko dugu. Gaztelumendi aurrez aurre dugu: inguruan pinuak, arkaziak eta haritzak. Azken haritzean zurezko hesi bat gainditu eta trokarroko beresirantz goaz. Gurpidea bidezidor bihurtzen da eta sahats eta haritz artetik errekara helduko gara. Zeharkatu eta aldapan behera joango gara ezkerreko barrenetik gaztainondo, haritz, arkazi, arte eta lizar artean. Ostera, 20 bat metro behera eginez, arkaziak nagusi diren gune bat ikus dezakegu. Halaber, hesi ondotik jarraituz eta beste errekatxo bat zeharkatu ondoren pinudia aurkituko dugu. Beti errekaren ezkerraldetik beherantz jarraituko dugu, arkazi, hurritz eta haritz artean, aipatutako errekatxo biek bat egin arte. Ekialderantz jarraituz, erreka pinudian sartzen da. Bi hesi gainditu eta gero txabola bat aurkituko dugu. Beronen ipar-ekialderantz dagoen gurpidetik beste errekatxo bat zeharkatu eta metro gutxitara S. Joan baselizaren hondakinak topatuko ditugu. Bideari jarraituko diogu Alaio auzunera heldu arte. Hemen Errepublika garaian egin eta ia erorita dagoen auzo eskola bat ere ikusi ahal izango dugu. Hemendik hego-mendebalderantz dagoen baserrira jo behar dugu. Bertara goazela, bi edo hiru aldiz alanbrezko hesiak zeharkatu beharko ditugu Gangoiti baserrira ailegatzeko. Baserri honen mendebaldera dagoen trokarrora abiatuko gara errekarekin topo egin arte. Errekaren ezkerraldetik jarraituko dugu. Pinu ugari badago ere, pagoak, haritzak, lizarrak eta makalen bat ikusi ahal izango ditugu. Pinuditik irteterakoan, Goikola auzunetik 500 metrotara aurkitzen gara. Segi erreka bazterretik eta eskuinetara ikusten dugun lehen baserria Ametza da.