Logoa
Logoa
aikor.eus

Gym Berdea hirugarrenez ipiniko da martxan otsailean

  Gizartea  Larrabetzu
Gym Berdea hirugarrenez ipiniko da martxan otsailean

Egitasmoak osasuna, zahartze aktiboa, gizarteratzea eta lorezaintza ekologikoa uztartzen ditu, eta gaur aurkeztu da prentsaurrekoan. Horretan hauek hartu dute parte: Lide Amibilia Gizarte Poliketako sailburuordea; Joseba Bidaurrazaga, Bizkaiko Osasun Publikoko zuzendaria, Iñigo Gaztelu, Larrabetzuko alkateak; eta Keko Alonso, Besaia Jardiecología & Alternativas forestales-eko sustatzailea.

Gym Berdea proiektu berritzailea da Estatuan, eta Larrabetzun 2016an egin zen lehen aldiz. Egitasmoak jarduera fisikoa, osasuna eta naturaren ezagutza sustatzen ditu, eta, aldi berean, aukera ematen du parte-hartzaileen arteko loturak ezartzeko. Hirugarren edizioari otsailaren 7an emango diote hasiera, eta izena ematea Anguleri kultur etxean egin daiteke, edo 699 73 98 51 telefono zenbakira deituta. Hilean 20 euro ordaindu beharko dira eta astean ordu bi eta erdiko saioa egingo da. Aurkezpen bi egongo dira: bata, otsailaren 1ean, 19:30ean, Errebalen; eta bestea, otsailaren 5ean, 19:30ean, Angulerin.

Egitasmoak Green Gym britaniarra du eredutzat eta definizio ugari onartzen ditu. Izan ere, aire zabaleko gimnasioa da, osasuna sustatzeko gunea, lorezaintza ekologikoa ikasteko tailerra, tipologia ezberdinetako lagunei zuzendutako taldeko jarduera, herria edertzea helburu duen proiektua, eta gizarteratzeko tresna.

“Ariketa fisikoa, ikaskuntza teoriko-praktikoa, lurrarekiko harremana eta harreman pertsonalak dira Gym Berdea osatzen duten elementuak”, azaldu du Alonsok. Amilibiaren esanetan, “proiektuak jarduera fisikoa sustatzen du eta hori oso positiboa da zahartze aktiboaren prozesuan”. Era berean, gizarte-defizitak dituzten parte-hartzea azpimarratu du. “Guym Berdea, halaber, bakarrik sentitzen diren pertsonei dago zabalik, adizioren bat utzi nahi dutenei, edo krisi pertsonal batean murgilduta daudenei”. Horrela, Gym Berdeak Larrabetzuko Manuene eguneko ospitalearekin eta sare komunitarioko beste baliabide batzuekin dihardu lankidetzan, proiektua hainbat egoeratan dauden pertsonen artean zabaltzeko eta bere onurak aprobetxatzeko.  

Bidaurrazagak aipatu du, herritartzen joan garen heinean, naturarekiko harremana galdu egin dugula eta egitasmoa baliagarria dela lotura hori berreskuratzeko. Proiektuaren onura batzuk ere aipatu ditu, hala nola pertsonen bizi-kalitatea,osasuna eta egoera fisikoa hobetzen direla, autopertzepzioa eta autozaintza ere hobetzen direla, eta parte-hartzailea ondare kolektiboa edertzen dabilen taldearen kide bihurtzen dela. Gainera, Gym Berdeak etengabeko ikaskuntza-osagaia du, oso komenigarria dena nerbio-sistemen endekapenezko gaixotasunak prebenitzeko.

 

50 urtetik gorako emakumeak  

Azkenik, Gazteluk oso positibotzat hartu du egitasmoa, eta adierazi du sakon sartu dela herritarrengan. Horrela, bada, horren bidez lortu da larrabetzuarrek lorategien zainketan parte hartzea. Bestetik, eta agroekologiaren ildotik, gogoratu du, orain dela urte batzuk, Larrabetzuk hondakin organikoak tratatzeko sistema sortu zuen: Larrabetzu Zero Zabor. Agrokonpostajearen prozesu horretan, etxez etxe jasotzen dira hondakin organikoak eta baserritar batzuek konpost bihurtzen dute. “Larrabetzuko eredua” moduan ezagutzen da Estatuan, eta batzuek interesa azaldu dute sisteman.

Antolatzaileen esanetan, 30 pertsona inguruk hartu dute parte Gym Berdearen aurreko edizio bietan, eta gehienak 50 urtetik gorako emakumeak izan dira. Parte-hartzaileek eskolako sei eta 12 urte bitarteko umeekin partekatu dituzte egitasmoan eskuratutako ezagutzak. Saioak ikasgelan hasten dira, egingo den lanari buruzko oinarrizko kontzeptu teorikoak azaltzen dira, eta lanaren deskribapena bera egiten da. Gero, beroketa aerobikoa eta luzaketak egiten dira, eta lanari ekiten zaio herriko espazio batean. Sustatzaileek proiektua beste udalerri batzuetara zabaltzeko asmoa dute.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa