Otsailetik dabil Intxurreta jai-batzordea lanean, herritar guztientzako andramariak eta sanemeterioak antolatzeko. Jai-batzordean parte hartzeko deia ere zabaldu zuten, eta, esan digutenez, aurten lagun gehiago daude bertan. Jai-batzordean adin-tarte guztietako jendea egon arren, batez ere lagun gazteek osatzen dute hura. Bestalde, partaide gehiago egoteak ekarri ditu ideia berriak. “Aurtengo nobedade nagusia Kuadrilla Txapelketa da. Jaietan zehar txapelketarako puntuagarriak diren bost proba egongo dira eta kuadrillek gutxienez lau egin beharko dituzte. Probak hauek dira: Kantuz Kantu talentu-lehiaketa, karrozak, dantza-lehiaketa, sukalkia eta poteo rallya. Azken hori ere nobedadea da, aurten lehenengo aldiz egingo dugu eta”. Era berean, mariatxien musika-emanaldia aipatu dute nobedade moduan, eta Gozategi taldearen kontzertua. “Gainera, goitibeherak berreskuratu ditugu sanemeterietarako”.
Nobedadeez gainera, urterik urte ederto funtzionatzen duten ekintzak ere antolatu dituzte. “Herri-afaria, esaterako, Larrabetzun urtean zehar egiten den ekintza potoloenetariko bat da, plazan herri osoa batzen da eta. Kintoen egunari ere, abuztuak 14, garrantzi handia ematen diogu, eta karrozak oso bereziak izaten dira. Ekintza horretan herri osoak hartzen du parte eta gero eta karroza hobeak egiten dituzte urte batetik bestera”.
Jaiak ospatzeko gogotsu dabil Intxurreta, eta jai-egitaraua ere gogotsu prestatu dute. “Egia esan, eskertzekoa da jai-batzordera lagun berriak hurbildu izana: horretarako beharrizana zegoela ikusi, eta ederto erantzun dute”. Halaber, Larrabetzuko Umeen Kontseiluaren ekarpenak kontuan hartu dituzte. “Adibidez, eskatu dute komun publiko gehiago jartzeko eta igerilekuetan joko zehatz batzuk ipintzeko”.
Emaitza adin-tarte eta herritar guztientzako jai-egitaraua izan da. “Jaietara gainerako herrietako jendea hurbiltzea eskertzekoa da, baina, betiko moduan, larrabetzuarrentzako ekintzak antolatzen ahalegindu gara; gure helburua ez da kanpoko jendea erakartzea. Herritarrentzako jaiak dira, eta herria izaten dugu kontuan”. Txupinazoa bota baino bi egun lehenago, abuztuak 12, ume eta helduen futbol-txapelketa hasiko da. Izena abuztuaren 9a baino lehen eman behar da intxurretajaibatz@gmail.com helbide elektronikora idatzita edo igerilekuetan. Hurrengo egunean, zapatuan, futbol-txapelketaren finalaurrekoak eta finala jokatuko dira; herri-afaria izango da, eta Kantuz Kantu ekitaldia.
Bizkargi dantza-taldeak txupinazoa botako du domekan, abuztuak 14, 13:00etan. Ondoren, kalejira, txaranga, umeentzako puzgarriak eta Xaiborren diskofesta egongo dira. Erromeria egingo da Laket taldeak girotuta, eta musikak Hori Bai gaztetxean jarraituko du Dj Garikoitz Lezkanoren eskutik. Besteak beste, kalejira izango da astelehena, mariatxiak, karrozak, elektrotxaranga eta dantza-lehiaketa. Gozategiren abestiek gaua girotuko dute, eta ostean Dj Bullek hartuko du lekukoa.
Martitzenean ur-jolasak egingo dira igerilekuetan. Umeen bazkaria ere egongo da, sukalkia eta poteo rallya. Bere 30. urteurrenaren harira, Gaztelumendi abesbatzak kontzertua egingo du eskolan, eta Lekittoko Deabruak taldearen su-ikuskizunak gaua argituko du. Kuadrilla Txapelketaren irabazleei saria eman ondoren, erromeria egongo da Zirkinik Bez taldearen eskutik.
Sanemeteriak
Abuztuaren 30etik irailaren 1era ospatuko dituzte sanemetariak eta horiek ere ekintzaz beteta etorriko dira. Txupinazoa martitzenean botako dute eta egun horretan izango dira marmitako- eta mus-txapelketak, dantzaldia, zezen-puzgarrien entzierroa eta erromeria. Anjel Mari Peñagarikanok eta Miren Amurizak bertso-saioa egingo dute eguaztenean, eta arratsaldean egongo dira briska-txapelketa, kalejira eta zunba-saioa. Eguna biribiltzeko, Joseba Tapiak Egon edo ez egon diskoa aurkeztuko du gauean. Eguenean, egurrezko jokoak, goitibeherak eta kalejira izango dira. Deabru Beltzak taldearen ikuskizunak amaiera emango die jaiei.
Lehen esan moduan, Intxurretak ospatzeko gogoa du. Baita herritarrek ere. “Aurreko urteetan izandako erantzun bera izateko eskatzen diegu, izan ere, oso erantzun polita izaten dute beti; jaietan parte hartu dezatela”. Amaitzeko, aipatu dute sexu-erasoen kontrako protokoloa prestatzen dabiltzala eta datozen egunotan horren berri emango dutela. “Tamalez, jai-giroan izaten diren sexu-erasoak kontuan hartu beharra dago. Espero dezagun Larrabetzun halakorik ez gertatzea; eta gertatuz gero, lehenengo momentutik erantzuteko eta laguntzeko prest egongo gara”.
Andramariak
Abuztuak 12, barikua
–17:30 Ume eta helduen futbol-txapelketa. Kanporaketak.
Abuztuak 13, zapatua
–17:00 Futbol-txapelketa. Finalaurrekoak eta finalak.
–20:00 Herri-afaria.
–22:30 Kantuz kantu. Herriko musikarien eskutik eta kuadrillen arteko talentu-lehiaketa.
Abuztuak 14, domeka
–11:00 Nazioarteko dantza-erakustaldia (Argentina eta Kanariar uharteak).
–13:00 Txupinazoa, Bizkargi dantza-taldearen eskutik. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
Ostean, Joselontxo´s txaranga.
–17:00 Umeentzako puzgarriak.
–20:00 Xaibor.
–23:30 Erromeria: Laket. Ostean, Dj Garikoitz Lezkano, Hori Bain.
Abuztuak 15, astelehena
–11:30 Kalejira. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
–12:00 Mariatxi Azteka taldea.
–13:30 Joselontxo´s txaranga.
–18:00 Karrozak. Ostean, Matraka elektrotxaranga.
–22:30 Dantza lehiaketa.
–22:30 Erromeria: Gozategi. Ostean, Dj Bull.
Abuztuak 16, martitzena
11:00 Kalejira. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
–11:30 Ur-jolasak igerilekuetan.
–14:00 Umeen bazkaria.
–14:30 Sukalkia.
–18:00 Poteo Rallya.
–20:00 Zurekin kontzertua. Gaztelumendi abesbatzaren 30. urteurrena, eskolan.
–22:30 Lekittoko deabruak.
–23:45 Kuadrilla txapeldunari saria ematea.
–00:00 Erromeria: Zirikinik Bez.
Emeteriak
Abuztuak 30, martitzena
–12:30 Txupinazoa. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
–14:30 Marmitako txapelketa.
–17:00 Mus txapelketa.
–17:30 Dantzaldia: Gauargi.
–19:30 Toriko entzierroa.
–22:00 Erromeria: Trikidantz.
Abuztuak 31, eguaztena
–13:00 Bertsolariak: Anjel Mari Peñagarikano Labaka eta Miren Amuriza Plaza.
–17:00 Briska txapelketa.
–18:00 Kalejira. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
–19:00 Zunba-saioa.
–21:00 Kontzertua: Joseba Tapiaren Egon edo ez egon diskoaren aurkezpena.
Irailak 1, eguena
–12:00 Egurrezko jokoak.
–17:30 Goitibeherak.
–20:00 Kalejira. Herriko txistulariekin eta Akarmarirekin, Paskualarekin, Matxinekin, Jesusarekin eta Akarbaltzekin.
–21:30 Deabru beltzak.