Azaldu dutenez, eskualdeko umeek Gurutzetako ospitalera joan behar dute larrialdia dutenean edo ospitaleratu behar dutenean; ondorioz “gurasoak etengabeko joan-etorriak egitera derrigortuta daude”. Era berean, emakumeek Gurutzetara edo Basurtura joan behar dute erditzera, “ez dagokien eta ezezaguna duten beste ESI bateko ospitalera” hain zuzen. Horren aurrean, “emakume askok erabakitzen dute ospitale txikiago batera joatea bertan eskaintzen zaizkien erditze-eredu indibidualizatuagoen bila. Dena den, ospitale horiek beste eskualde batean egonda, eskualde horietako pazienteek dute lehentasuna, eta, erditze egunean lekurik ez badago, gerta daiteke beste ospitale batera joan behar izatea”. Horrezaz gainera, azpimarratu dute gero eta emakume gehiagok eskatzen dutela erditze gizatiarragoa, indibidualizatuagoa, errespetuzkoagoa eta emakumeen autonomiaren aldekoa. “Eskaera eta neurri horiek indartu dituzte ikerketa zientifikoek, zeinek bermatzen baitute gomendio horietako zenbait onuragarriak direla amaren eta haurren osasunerako. Horrela, erditze-ereduaren aldaketa horiek pixkanaka gauzatzen ari dira”.
Gauzak horrela, hainbat arrazoi eman dituzte Galdakao-Usansoloko ospitalean pediatria eta erditze-zerbitzua ipintzeko. “Oinarrizko zerbitzuak dira eta gure eskualdeko haur eta emakumeen osasun-arretaren aldeko neurri garrantzitsua da: arreta indibidualagoa, hurbilagoa, ezagunagoa eta euskaldunagoa izango litzateke”. Bestalde, azpimarratu dute emakumeak ahalduntzeko erditze-gune eta -eredu humanizatuagoa behar dela, emakumeen osasunerako onuragarriagoa dena eta genero-perspektibatik landuagoa dena. Azkenik, esan dute osasun-ekitatearen aldeko neurria dela eta hurbilen duten ospitale publikoa dela.
Ekimenarekin bat egin nahi duten taldeek barrualdeaosatuz23@gmail.com helbide elektronikora idatzi ahal dute, eta banakakoek https://www.change.org/p/pediatria-eta-erditzeak-galdakaoko-ospitalean webgunean sinatu.