a: Gaizka Peñafiel
“Lezamako mugetatik” mendi martxak eta lasterketak hasiera emongo deutse San Antolin eguneko ospakizunei irailaren 2an. Ondoren, San Antolin auzoan, mezea, herri bazkaria eta briska txapelketea egongo dira. Andramariak irailaren 7tik 10era bitartean izango dira eta, Basobaltz jai-batzordetik adierazo deuskunez, Zorribike txirrindulari alkarteak pregoia irakurtzeko ardurea eukiko dau aurten. “Hamargarren urteurrena ospatzen dabilz eta hasiera-hasieratik hartu dabe parte jaietan”. Datorren urtean herri galdeketea egingo da Lezaman erabakitzeko eskubidearen inguruan, eta Gure Esku Dago plataformak galdeketea aurkeztuko dau jaietako lehenengo egunean. Ondoren, mariachiak etorriko dira.
Lezamatarrak kalera urtetea hartu eben helburutzat joan dan urteko jaietan, eta, euren esanetan, helburua bete eben, zer hobetu beti dagoan arren. “Herri partaidetzea da gure ezaugarri nagusia eta horretan lan egiten jarraituko dogu urterik urte, goiburu beragaz: jaiak herritik eta herriarentzat”. Hala, adin-tarte guztientzako moduko ekitaldi-sorta zabala antolatu dabe, herritarrek ahalik eta ondoen pasetako: kale antzerkia, elektrotxarangea, kontzertuak, puzgarriak, dantzak, bertsolariak, pelota partiduak... “Programari jagokonez, aurreko urteetako egiturari emon deutsagu jarraipena, baina aldaketa batzuk egongo dira. Esate baterako, bertso poteoa barik bertso emonaldia egingo da zapatu eguerdian, eta txosnagunean txitxi-burruntzia eskainiko da”.
Bertsolariak nortzuk diran kontuan hartuta –Lujanbio, Lekue, Enbeita eta Arzallus–, uste dabe emonaldian jentea batuko dala. Barikuko mozorro jaitsierea be jentetsua izango dala iragarri dabe. “Aurreko urte bietan egon dan giroa ikusita, arrakastatsua izango dala uste dogu, eta giro polita egongo dala. Aurtengo gaia gastronomia da”. Jaitsieraz gainera, trikitilariak, pelota partiduak eta mozorro lehiaketak egongo dira. Eta nobedade bat: Zorriztorock gaua. Jai-batzordeak beste ukitu bat emon gura izan deutso bariku gauari eta eszenatokian aritzeko talde honeek ekarriko dabez: Mamagigi´s, Txapelpunk, Txarango eta Zartako-K.
Baina hori ez da izango aurtengo jaietako nobedade bakarra, zapatu arratsalderako herritar guztiei zuzendutako yoga klasea antolatu da-eta eskolan. Bestalde, puzgarriak, kale antzerkia eta abesbatzen emonaldia be egongo dira. Kontzertuak Lágrimas de sangre, Skakeitan eta Garilak 26 musika taldeenak izango dira. Gainera, Andra Mari jaietako egun guztietan, eta afaltzeko, odolosteak egongo dira herriko taberna eta jatetxeetan.
Bolaleku eta Kurtze
Domekan, Bolalekuko jaiak ospatuko dabez Lezaman. Goizean, MTB lasterketea egingo da, eta paella txapelketea. Arratsalderako, mus txapelketea, puzgarriak, txokolatadea eta erromeria antolatu dabez. “Kurtzeko jaiak gorantz doazan auzoko jaiak dira, eta zapatuko sukalki txapelketan oso giro polita izaten da urterik urte”, aitatu deuskue jai-batzordetik. Aurreko urteetako eskemari jarraituta, jaiak irailaren 14tik 16ra bitartean ospatuko dabez Kurtze auzoan. Eguenean txupinazoa bota eta kalejirea eta erromeria egongo dira barikuan. Egun nagusia zapatua izango da. Goizean, tailerrak egingo dira umeentzat; eta jolasak arratsaldean. Sukalki eta tortilla txapelketak be egingo dira, eta bike-trial erakustaldia, arratsaldean. Tradizinoa danez, zozketak egingo dira, eta solomo eta hirugiharra-ogitartekoak egongo dira afaltzeko. Sorgina erre eta suziriak botako dira. Diskofesta batek girotuko dau gaua.
Basobaltz jai-batzordeko kideek lezamatarrei eta txorierritar guztiei be egin deutsee Lezamara hurbildu eta jaietan parte hartzeko gonbidapena. Hau da, “udari behar dan moduko amaierea emoteko”. Hortxe dogu udako azken hitzordua, beraz.
Jai-egitaraua
Irailak 1, barikua
–18:00 Pelota partiduak: pelota eskolako umeak (binakako partiduak); Andra Mari Pelota Txapelketako finalerdiak
Irailak 2, zapatua.
San Antolin
Herrian
–08:30 XI. Lezamako Mugetatik mendi martxea
–10:00 XI. Lezamako Mugetatik lasterketea eta martxa txikia
San Antolin auzoan
–12:30 Mezea. Jarraian, koputxoa trikitilariek girotua
–14:30 Azken ordua, bazkarirako txartelak erosteko
–15:00 Herri bazkaria, Lezama Saretzen alkartearen laguntzeagaz
–16:30 Briska txapelketea
Irailak 3, domekea
–14:30 Jubiladuen bazkaria
Irailak 7, eguena.
Odoloste Eguna
–19:00 Txupinazoa eta Kurutze dantza taldearen emonaldia
–19:45 2018ko herri galdeketea aurkeztea, Gure Esku Dago plataformaren eskutik
–20:00 Mariachiak
–Jatetxe eta tabernetan odolosteak afaltzeko
Irailak 8, barikua.
Andra Mari eguna
–12:30 Mezea
–13:00 Trikitilariak, tabernetatik
–18:00 Pelota partiduak: pelota eskolako umeak (buruz buru eta 4 t´erdi); emakumezkoen partiduak; eta Andra Mari Pelota Txapelketearen finala
–19:00 Koadrilen jaitsierea, Mikel Zarate enparantzatik; gaia: gastronomia
–19:30 Pregoia, Zorribike alkartearen eskutik
–19:45 Poteoa, herriko tabernetatik, Sakatu elektrotxarangak girotua
–21:30 Txosnak zabaltzea
–22:00 Umeen mozorro lehiaketaren sariak banatzea
–22:00-00:00 Mozorrotuta dagozanentzat, 2x1 garagardo eta kalimotxo katxietan eta alkohol bako edarietan
–22:00 Zorriztorock: Mamagigi´s, Txapelpunk, Txarango eta Zartako-K
–01:00 Nagusien mozorro lehiaketearen sariak banatzea
–Jatetxe eta tabernetan odolosteak afaltzeko
Irailak 9, zapatua
–11:00-14:00 Puzgarriak umeentzat
–12:30 Mezea
–13:15 Bertso saioa: Etxahun Lekue, Maialen Lujanbio, Onintza Enbeita eta Amets Arzallus. Gai-jartzailea: Josu Goikoetxea
–13:30 Txitxi-burruntzia, txosnagunean
–16:30-19:30 Puzgarriak umeentzat
–17:00 Yoga eskolatxoa adin guztientzat, eskolan
–19:00 The Funes Troup kale antzerkia, plazan
–20:00 Ekidazu abesbatza eta Donostiako Musikalis abesbatza, eleizan
–22:00 Txosnak zabaltzea
–23:00 Kontzertuak: Lágrimas de sangre, Skakeitan eta Garilak 26
–Jatetxe eta tabernetan, odolosteak afaltzeko
Irailak 10, domeka.
Bolalekuko jaiak
–09:30 “Andra Mari” IX. MTB Lasterketea, Zorribike alkarteak antolatua
–12:30 Mezea
–13:30 Paella txapelketan izena emotea
–15:00 Paellak aurkeztea eta sariak
–16:00 Mus txapelketea
–17:00 Puzgarriak umeentzat
–19:30 Txokolatadea
–20:00 Erromeria, Hotza taldeagaz
Kurtzeko jaiak
Irailak 14, eguena. Santa Kurtze Eguna
–12:00 Txupinazoa eta jaien hasierea
–12:30 Mezea, ermitan
–Kopaua, auzokideentzat
Irailak 15, barikua
–12:30 Mezea
–20:00 Kalejirea, auzoko tabernetatik. KZ taldearen eskutik
–22:30 Erromeria, Broken Izotz taldeagaz
Irailak 16, zapatua
–10:00 Mahaiak eta aulkiak banatzea
–11:00 Haurrentzako tailerrak, goizean; eta jolasak, arratsaldean
–11:30 Sukalki eta tortilla txapelketetan izen emotea
–13:00 Fanfarrea/txarangea
–14:00/14:15 Sukalkia eta tortillak aurkeztea. Ondoren, sariak banatzea
–14:00 Jolasetan parte hartzen daben 12 urtetik beherako umeentzako bazkaria
–18:00 Bike-trial erakusketea
–20:00 Zozketak
–20:00 Afari-meriendea: solomo eta hirugiharra-ogitartekoak
–21:30 Diskofestea
–22:00 Sorgina erretzea eta suziak
–Diskofestea