Jon Ander Aurrekoetxea alkateak adierazi duen moduan, Ondare Saileko teknikari birekin ibili dira informazio-taula guztien kokapena aztertzen, hori egokia zen ikusteko. Andra Mari elizak babes berezia du, eta, horregatik, haren ondoan ipinitako informazio-taula zein Sabino Arana plazan jarritakoa 15 metrora mugitu behar dira. Alkatearen esanetan, taula biak aldatzeko lanetan dabiltza eta laster egongo dira kokapen berrian. Bestalde, eta foru aldundiak xehatu duen moduan, Kurtzeko ermitak oinarrizko babesa du; hala ere, “nahiz eta babes-eremurik ez izan, ez dirudi kokapena egokia denik, zeren ez baitu ahalbidetzen eraikinaren ikuspegi integrala eta eragozten du, espaloi mugakidean, oinezkoen zirkulazioa”. Hori dela eta, informazio-taula sei metrora mugitu da.
Azkenik, aldundiak zehaztutakoaren arabera, “errespetatu beharko dira Errepideen Foru Arauak. Edozein kasutan, errepideen arloan Sail eskumendunari eskatu behar zaio baimena”. Aurrekoetxeak azaldu duenez, Done Jakue bidea ere foru aldundiaren eskuduntza da eta berarengana jo dute. Gainera, 10 urte ingurutik hona errepide hori ez da forala, herrikoa baizik. Ondare Saileko teknikariek ez dute beharrezkotzat jo taula-informazioa handik mugitzea.
Informazio-taulak ipini zirenean udalak azaldu zuenez, taulak bisitariak herrira erakartzeko jarri ziren, eta, horretarako, hitzarmen bat egin zen Athletic futbol-klubarekin. Informazio-tauletako alde batean, lekuaren edo ondare-eraikinaren gaineko informazioa dago; eta beste aldean, futbol taldekoari buruzkoa.