Herri-sentimendua eta jaien tradizioa sustatuko dira Lezaman

“Jaiak herritik eta herriarentzat” lemari jarraituta, herriari bizitasuna ematea du helburutzat Basobaltz Lezamako jai-batzordeak. “Lezamarrak jai-giroan murgildu nahi ditugu, egun osoko ekin- tzetan parte hartzea sustatuz eta, horrela, koadrilen arteko harremana sendotuz”, azaldu dute. Baina pauso bat harago ere egin nahi dute, eta tradizioari eta kulturari eusteko asmoa dutela, belaunaldi berriei herriko jaiekiko sentimendua helarazteko beharra ikusi dute. “Gure premia da lezamarrengan herri-sentimendua eta jaien tradizioa sustatzea, herriko jaien kultura eta euskararen garrantzia mantenduz. Jai herrikoi eta euskaldunen alde gaude, parte hartzea bultzatzen duten jaien alde!”.

Horretarako, eta urtero egiten duten moduan, adin eta gustu guztientzako jai-egitaraua antolatzen ahalegindu dira. Ekintzen artean nobedadeak ere egongo dira. “Jai-egitarauari dagokienez, nobedaderik handiena da irailaren 8an, Andra Mari egunean, hainbat ekintza antolatu ditugula: erraldoien kalejira, umeentzako disko-festa, dantza-plaza… Baina badugu beste nobedade garrantzitsu bat: jaietako informazioa zabaltzeko eta herritar guztiengana heltzeko, webgune bat sortu dugu, eta bertan jaiei buruzko informazio guztia egongo da eskuragarri, edonork kontsultatu ahal izateko. Webgunea hurrengo lotura honetan dago: https://sites.google.com/view/lezamakojaiak/inicio”.

Aipatu dutenez, ekintza guztiek dute euren xarma; hala ere, pare bat-edo azpimarratu dute. “Barikuko mozorro-jaitsierak arrakasta handia izaten du. Jaitsieran 20 koadrilak baino gehiagok hartzen dute parte, eta horrek bizitasun handia ematen die jaiei. Bestalde, herri-bazkariak harrera ikaragarria izan zuen iaz, eta han adin guztietako zorrizto asko batu ginen. Gainera, Zorrizketanek bingo musikatua antolatu zuen bazkalosterako eta oso giro polita egon zen. Aurten koadrilen arteko lehiaketa egongo da bingo ondoren; zein izango da Lezamako koadrilarik trebeena?”.

Beste alde batetik, sexu-erasoei aurre egiteko protokoloa ere izango da, eta aurreko urtean moduan, brigada feminista osatu da jaiei begira. “Irailaren 6an eta 7an, 22:00etatik 06:00etara, brigada feminista egongo da, Moreak talde feministak, Lezamako Udalak eta Berdintasun Kontseiluak sustatuta. Erasorik gabeko jaiak nahi ditugu, eta argi utzi nahi dugu Lezaman ez dugula inolako eraso sexistarik, homofoborik edo arrazistarik onartuko”. 

Ohikoa denez, Lezamako Mugetatik mendi-lasterketa eta San Antolin Eguna izango dira Andra Mari jaien bezpera. Andramariak barikuan, irailak 6, hasiko dira. Arratsaldean, jaietako ekintzarik potenteenetariko bat izango da, mozorro-jaitsi- era, eta aurten Euskal Herria aukeratu da gai moduan. Lezama Saretzen elkarteak pregoia irakurri, eta txupinazoak hasiera ofiziala emango die jaiei. Horren ostean, gustu guztientzako musikaz gozatzeko aukera egongo da: Puro Relajo, Sakatu, JotaKe erromeria-taldea eta Dj Serna.

Zapatua Odoloste Eguna izango da, eta jatetxeetan eta tabernetan odolosteak izango dira dastatzeko. Jai-egitarauari dagokionez, Zorribike elkarteak antolatuta, punptrack erronka egongo da goizean, eta 11:30etik aurrera umeentzako ekin-tzak, hala nola ur-puzgarriak, ludoteka eta tailerrak. Kopaua eta bingoa egingo dira Adintsuen Elkartean, eta Burrundadie batukada-taldeak eguerdia girotuko du herri-bazkariaren ordurarte. Bazkarirako txartelak irailaren 1era arte egongo dira salgai dendetan eta tabernetan. Ostean, bingo, mus-txapelketa eta koadrilen arteko lehiaketa egingo dira. Clown mago baten ikuskizuna eta trikiti-poteoa ere izango dira, eta agertokira igoko dira Xsakara, Xiberoots eta Dj Calonge.

Zaindariaren eguna ere ekintzaz beteta etorriko da. Erraldoiak kalejiran irtengo dira goizean, eta disko-festa eta Ekidazu abesbatzaren eta Bilboko Akordeoi Taldearen musika-emanaldia egongo dira. Arratsaldean, bestalde, euskal dantzen erakustaldia, esku-pilota eta pala partiduak eta dantza-plaza izango dira aurtengo jaiei agur esateko. Andramariak amaitu arren, jai-giroak jarraituko du Lezaman, martitzenean, irailak 10, Bola-lekuko jaiak ospatuko dira eta. Paella-txapelketaz gainera, zurezko jolasak eta txokolatada egongo dira, eta Dj Kaktusek dantzan ipiniko ditu umeak eta helduak. 

Santa Kurtze

Kurtzeko jaiek lekukoa hartuko die andramariei. Txupinazoa barikuan, irailak 13, botako da eta Zuzterrak taldeak girotutako trikiti-poteoa eta Knaiak taldearen kontzertua izango dira. Gainera, odolosteak dastatzeko aukera egongo da tabernetan. Zapatuan, sukalki- eta tortilla-txapelketak egingo dira, eta aulkiak eta mahaiak hartzeko txartelak aurretik erosi beharko dira tabernetan. Goizean ere, Zorribike txirrindularitza-elkarteak antolatuta, MTB gazte-martxa egingo da bosgarren aldiz: izena emateak hiru euro balioko ditu aurretik, eta bost euro, egunean bertan. Era berean, umeentzako ur-puzgarriak eta tailerrak egongo dira, eta areto dantzen erakustaldia, Lezamako Areto Dantza Taldearen eskutik.

Bazkaldu ostean, holi festa koloretsua egingo da, eta, badaezpada, antolatzaileek bainujantzia eta arropa zaharra janz- teko gomendioa egin dute. Tolin Show eta bingoren ostean, Etxebarria Aita Semea Trikitilariek girotuko dute iluntzea, eta afaltzeko, hirugihar- eta txorizo-ogitartekoak salgai ipiniko dira euro batean. Sorgina erreko da, eta jaiak amaituko dira.  Dj Benek musika ipiniko dio gauari. Domeka arratsaldean, eta Lezama Sport kirol taldeak antolatuta, Mikel Llodioren oroimenezko partida triangularra jokatuko da Athleticeko instalazioetan, eta bertan norgehiagoka ibiliko dira Lezama Sport, Solokoetxe eta Iberlanda.

EGITARAUA