Zelan denboraldiaurrea?
Ondo. Aurten, jokalari gazte eta berri asko ditugu eta egokitze prozesuan gabiltza. Denbora beharko dugu. Denboraldiaurrean emaitzak ez dira garrantzitsuak, baina talde atzerritarren kontra maila ona erakutsi dugu. Euskal Kopan, aldiz, Erreala hobea izan zen eta galdu genuen. Irrikan gaude Liga hasteko.
Zeintzuk dira aurtengo helburuak?
Taldea egonkortu nahi dugu. Sei jokalari galdu ditugu eta beste sei etorri dira euren ordez. Presidenteak eta biok horren berri eman genuen prentsaurrekoan eta bertan iazko denboraldia hobetu nahi dugula esan genuen. Kalitate handiko jokalariak joan dira, baina gure gazteek ere badute talentua. Eta talentuari eutsi nahi diogu.
Jokalari on batzuk beste talde batzuetara joan dira. Zergatik?
Presidenteak esan zuenez, batetik diruarengatik, kanpoan gehiago irabazten dutelako; eta bestetik, kirol-proiektuarengatik, kanpoko taldeak goi-mailako txapelketak irabazteko faboritoak direlako. Egoera zein den badakigu; lanean gaude hobetzeko.
Jokalari garrantzitsu batzuek –Vanesa, Moraza, Erika eta Lucia– utzi dute kluba. Aurten, taldea hobea ala okerragoa da?
Ez bata, ez bestea, desberdina. Lucia eta Erika taldeko jokalaririk onenetarikoak ziren, baina jokalari gazte on batzuk ditugu eta beste batzuek aurrerapausoa egin beharko dute. Agian, indibidualki irudimena eta eskarmentua galdu ditugu, baina taldeko giroa oso ona da eta jokalariak motibatuta daude.
Jokalari batzuk Espainiako selekzioarekin txapeldunak izan dira gazte mailan –Ane Elexpuru, Clara Pinedo eta Maite Zubieta–. Jokatzeko aukera izango dute aurten ala goizegi da?
Eurek, errendimenduaren arabera, esango dute noiz egongo diren prest lehenengo taldean jokatzeko. Gauza bat da Europako txapelketa gazte mailan irabaztea; eta beste bat da Ligan, munduko jokalaririk onenen kontra, aritzea. Egokitze prozesua egon behar da, baina gazteek jokatzeko estimulua izango dute lehenengo taldean edo bigarrenean, Bigarren Mailak ere exijentzia handia duelako. Gure filosofiarengatik, gazteek Athleticen beste talde batzuetan baino aukera handiago dute lehenengo taldean jokatzeko.
“Gazteek Athleticen beste talde batzuetan baino aukera handiago dute lehenengo taldean jokatzeko"
Zelan Jon Uriarte presidente berriarekin?
Ondo. Hauteskundeek ziurgabetasuna sortzen dute Athleticen profesionalongan. Hala ere, hemen jarraituko nuela jakinda joan nintzen oporretara. Horrek konfiantza ematen dizu. Uriartek gertutasuna eta inplikazioa adierazi dizkigu.
Entrenatzaileen ibilbideak ez dira klub berean luzeak izaten. Zelan ikusten duzu etorkizuna, Athleticen betiko ala beste talde baten entrenatzaile?
Klubeko emakumea naiz eta orain gustura nago hemen. Dena dela, Lehenengo Mailako entrenatzaileok jakin badakigu, emaitza onak ez badira, zer gertatu ahal den. Edozein gauza gerta daiteke. Beraz, egunerokotasunean jartzen dut arreta. Ez dakit zer egingo dudan bost urte barru. Entrenatzea asko gustatzen zait eta ez dut nire burua ikastola baten irakasle ikusten. Errendimenduari lotutako lana oso estresagarria da, baita nire bokazioa ere. Arlo horretan ikusten dut nire burua.
"Entrenatzea asko gustatzen zait eta, esate baterako, ez dut nire burua ikastola baten irakasle ikusten"
Bukatzeko, emakumezkoen futbolari buruz galdetu behar dizut. Aurrerapausoak egin dira, baina noraino hel daiteke?
Ingalaterrako Liga erreferentetzat hartzen dut. Bertako klubek eta federazioak inbertsio handia egin dute zenbait esparrutan: marketinean, partida guztiak ematen dira telebistan, estadio onenetan jokatzen dute... Estatuko Ligan, aldiz, gauza asko hobetu behar dira: talentu handiko jokalariak izan arren, ez dugu jakin produktua behar bezala saltzen; zelaiak hobetu behar dira ikuskizunaren onurarako; partidak telebistan eman behar dira, horren bidez, babesleak ere etorriko direlako... Apurka-apurka profesionaltasunera hurbiltzen gabiltza, teknikarion eta jokalarien baldintzak asko hobetu direlako, eta horrek egonkortasuna emango digu, baina lan handia dago egiteko. Azken bolada honetan, gatazka asko egon dira emakumezkoen futbolaren inguruan eta penagarria da. Liga eta Federazioa elkarrekin joango bagina, emakumezkoen futbola arinago garatuko litzateke. Eta gauzak ondo egiten badira, ziur nago etorkizun hurbilean Estatuko Liga munduko onena izan daitekeela.
Erreferentea
Iraia Iturregi Sustatxa loiuztarra (1984) erreferentea da Athleticen: guztira, 15 denboraldi eman zituen talde zuri-gorrian eta 401 partida jokatu; 2010ean, oraindik jokalaria zela, hasi zen entrenatzen eta harrezkero kategoria guztietatik ibilia da. 2017an, erretiroa hartu zuen, baina bigarren taldean hasi zen; 2021ean, azkenean, lehenegoan. "Lezaman eman dudan ibilbidea oso aberasgarria izan da", esan du Iturregik.
Loiuztarrak ez du bere karrerari buruz gehiegi pentsatzen, egunerokotasunari arreta jarri nahiago baitu. "Nire lana ahalik eta ondoen egiten saiatzen naiz eta erreferentea banaiz, ederto, esate baterako, beste emakume entrenatzaileak motibatzeko. Lezaman lan piloa egiten da hainbat arlotan: kirola, gizartea, emakumearen ahalduntzen, emakumezkoen futbola merezi duen tokira eramaten... Nire ustez, hau da garrantzitsuena: ohera joan eta lasai lo egin, egunero ahal dudan guztia egin dudalako, bai taldearen, bai klubaren onurarako. Eta klubak aintzat hartzen du nire lana, beraz, poz-pozik nago".