“Egoera oso larria da, eta are gehiago egiten dituzten lanak kontuan hartuta. Langile hauek ehorzketa-lanetan ibiltzen dira, eta zerbitzu horiek oso bereziak dira udaletxe batean eman behar diren zerbitzuen artean”, adierazi du ELA sindikatuak komunikatu batean. Andoni Berazak, Udaleko ordezkariak, lanpostu hori Txorierritik kanpoko enpresa pribatu batek beteko duela adierazi du El Correo kazetan. Langileak, aldiz, ez daude ados: “Lanpostu hori behar bezala bete behar da Udalarekin kontratua daukan langile batekin”, aldarrikatu dute. “Eta Udalak hartutako erabakiak aurrera egiten badu lanpostu bat desagertuko da, Udalak eman behar dituen zerbitzuetan atzera-pausua eman eta lanpostu prekarioak sortuko dira”. “Langileek greba egiteko eskubidea erabat errespetatzen dugu”, adierazi du Xabier Zubiaur alkateak prentsa-ohar batean. “Erabaki horren helburua baliabide kopurua handitzea da. Horrela, sondikoztarrek merezi duten zerbitzu kalitatea bermatuko dugu”. Udalak argitaratu duen jakinarazpenean, gaur egun Sondikako brigadak eskaintzen duen zerbitzua kanpoko enpresa baten bidez hobetu nahi dela aipatzen da: “Gaur egungo langileak momentura arte lan egin duten bezala jarraituko dute eta, horrezaz gain, lan hori osatzeaz arduratuko den enpresa egongo da, aktibitatea bikoiztuz. Erabakiak ez du eraginik izango gaur egungo lan-taldearen lan baldintzetan”. Zubiaurrek azaldu duenez, Bizkaiko bestelako herrietan modelo bera ezarri da, “eta ez da greba kasu bakar bat ere eman”. Bertan antzeko kasuak ematen direla aipatu du: “Sondikan barneratu dugun modeloa da: lorezaintza, bide-garbiketa, zabor-bilketa, argiztapen sistema, arratoi-ezabatze sistema...”.