Azaldu moduan, udalak herritarren parte-hartze aktiboaren aldeko apustua egingo du, “haien esperientzia eta hirigintza-pertzepzioa funtsezkoak baitira beharrak identifikatzeko eta irtenbide eraginkorrak diseinatzeko”. Ideiak eta proposamenak jasotzeko, datozen asteetan hainbat kontsulta-bide zabalduko dituzte, hala nola inkestak, bilera irekiak eta herritarrek parte hartzeko guneak. “Sondika herritar guztientzako udalerria izatea nahi dugu, euren generoa, adina edo egoera edozein izan da ere; segurtasunez eta lasaitasunez bizitzeko eta mugitzeko aukera izan dezagun”, esan du Naia Landa alkateak. “Sondika bidezkoago eta inklusiboago bat eraiki nahi dugu, eta sondikoztarren eskutik eraiki nahi dugu”.
Adierazitakoaren arabera, proiektuaren lehen ekintzen artean dago genero-ikuspegitik Sondikako hirigintza-egoera diagnostikatzea. Horretarako, leku publikoetara, mugikortasunera eta zerbitzuetara berdintasunez iristea zailtzen duten oztopo nagusiak identifikatuko dituzte. Ondoren, hobekuntza-estrategiak eta proposamen zehatzak diseinatuko dira. Inkestak betetzeko paperak eskuratu daitezke udal-liburutegian, Nagusien Etxean, kiroldegian, gaztetxean eta udaletxean. Inkesta online ere bete daiteke hemen. Udalak herritar guztiak animatu ditu prozesuan parte hartzera. Datozen egunetan ezagutaraziko dituzte parte hartzeko moduak eta datak. Informazioa udal-webgunean, gizarte-sareetan eta udal-aldizkarian zabalduko dute.