Lankidetza-hitzarmenari esker, erakunde biek informazioa, datuak eta zerbitzu elektronikoak partekatuko dituzte. Horretarako, elkarreragingarritasun sistema bat erabiliko dute. Sistema horrek aukera ematen du, paperezko ziurtagirien eta gainerako agirien ordez datu-transmisio elektronikoak erabiltzeko. Gainera, partekatu den informazioaren benetakotasuna, osotasuna, isilekotasuna, eskuragarritasuna eta kontserbazio-baldintzak bermatzen ditu.
Azaldu duten moduan, hitzarmena beste urrats bat da Herritarrak Zerbitzu Publikoetara Sarbide Elektronikoa izateari buruzko 11/2007 Legea betetzeko. Lege horren arabera, erakunde publikoek bide elektronikoak ipini behar dituzte herritarren eskura, horiek Administrazioarekin harremanetan jarri ahal izateko. Era berean, informazioa trukatu behar dute, herritarrek izapide administratiboak errazago egin ditzaten.
Erakundeen ustez, hitzarmenak onurak ekarriko dizkie bai herritarrei, bai Administrazioari. Hala, herritarrek ez dute leku batetik bestera ibili beharko, agiriak eskuratu eta aurkezteko, edota erakunde batean baino gehiagotan eskaerak tramitatzeko. Izapide administratiboetan edo ziurtagiriak eskatzerakoan aurkeztu beharreko agiri-kopurua ere murriztuko da, eta zerbitzu gardenago eta errazago bat jasoko dute. Bestalde, erakundeen esanetan, Administrazioaren eraginkortasuna hobetuko da, kostuetan eta egoitzetan aurreztuko da, lan-zama arinduko da eta informazioaren kalitatea hobetuko da.
Lankidetza-hitzarmenak lau urteko iraupena du eta urtez urte luza daiteke modu automatikoan, gehienez 15 urtez. Ez dauka koste ekonomikorik aldeetarako.
Udala