Loiuko azokak 25 urte bete ditu aurten eta urteurrena urriaren 14an eta 15ean ospatuko dute, Ondarearen jardunaldiekin bat eginez. Hala, urriaren 14an, zapatuan, txu-txu tren bat egongo da goizean eta bidaiariak herriko leku esanguratsuetatik eramango ditu, hala nola San Pedro eliza, ortu ekologikoak, Bengoetxe baserria, Larraburu jauregia, Goiengo errota eta Arbildua baseliza. Txakolinaren dastatzea ere egingo da. Arratsaldean, kale animazioa egongo da, eta 18:00etan, garagardo dastaketa. Domekan, goizeko 10:00etatik aurrera, Gastronomia eta Eskulangintzako Azoka izango da. Animaliak egongo dira ikusgai eta herri kirolen erakustaldia egingo da. Oilaskoa eta txakolina dastatzeko aukera ere egongo da.
Urriaren 26an, “Derio, paisaia eta garapena” hitzaldia eskainiko da 19:00etan, Kultur Birikan eta Labayru institutuak egindako bideoa ere aurkeztuko da. Urriaren 28an, ibilalditxoa egingo dute herritik.
Txakolina
Amagoia Guezuraga historialariak Zamudioko errege-bideei buruzko hitzaldia eskainiko du urriaren 18an, 17:00etan, Bizkaiko Elizaren Histori Artxiboan (Larrauri 1A-5. solairua – Seminarioa), eta urriaren 22an ibilalditxo bat gidatuko du herritik. Sabino Arana plazatik irtengo da 10:00etan, eta jarduera bietan izena emateko 944062490 telefono zenbakira deitu daiteke.
Lezama da txakolingile eta upategi gehien duen udalerritako bat. Txakolina erabakigarria izan da herriaren paisaian eta baserrietako ekonomian. Horrela, bada, aurten ibilbide gidatua egingo dute zenbait mahastitatik eta upategi bat ere bisitatuko dute, han txakolina dastatzeko. Ibilbidea urriaren 22an, 11:00etan izango da eta topaleku Udaletxeko plaza izango dute. Izena emateko, 94 455 61 26 telefono zenbakira deitu behar da, edo liburutegia@lezama.org helbide elektronikora mezu bat bidali.
Azkenik, Larrabetzun bisita gidatua egingo dute urriaren 28an. Plazatik 10:00etan aterako dira.