Euskaraldiak herritarren eguneroko harremanetan hizkuntza inertziak astintzea eta euskararen erabilera areagotzea ditu helburu. Hala ere, sustatzaileek jakin badakite COVID19ak eragin handia izango duela egitasmoan. “Kalean presentzia txikiagoa izango dugun arren, hurbileko harreman-sareetan hizkuntza-ohiturak aldatzea posible da, eta Euskaraldia egin egingo da”, esan zuen Arrate Illaro Euskaraldiaren koordinatzaileak. Berarekin batera hauek izan dira agerraldian: Bingen Zupiria Eusko Jaurlaritzako bozeramale eta Kultura eta Hizkuntza Politikako sailburua; Unai Rementeria Bizkaiko Ahaldun Nagusia; Koldo Narbaiza Bilboko Udalaren Euskara eta Hezkuntza zinegotzia; eta Jasone Mendizabal Euskaltzaleen Topaguneko zuzendaria.
Euskaraldian izena emateko epea oraindik dago irekita. Orain arte apuntatu diren gehienek ahobizi izatea erabaki dute, beraz, antolatzaileek belarriprestek ere parte hartzea eskatu dute. “Ariketa egiteko, bi rolak dira beharrezkoak, taldean euskara gehiago erabiltzeko”. Aurten, Euskal Herriko 421 udalerritan egingo da ariketa, eta 25.000 arigunetik gora osatu dira 6.800 entitatetan. Hurrengo asteotan, Euskaraldiaren sustatzaileek sarean eta gailuen arteko komunikazioan ahobizi edo belarriprest aritzeko gomendioak eta jarraibideak zabalduko dituzte.
Beste alde batetik, Euskaraldiaren antolatzaileek ekimena kalean ikusgarri egin nahi dute. “Kaleko ekintza, ekitaldi eta harreman sozialak mugatuta egonik, milaka herritarrek egingo duten ariketa soziala bistaratu nahi dugu”. Horretarako, hainbat formula egongo dira: batetik, lehen edizioan bezala, belarriprestek eta ahobiziek txapa erabiliko dute; bestetik, ariguneak ere identifikatuko dira, euskarri fisikoak erabilita zein telefono aplikazioan geolokalizatuta; eta azkenik, leiho, balkoi eta erakusleihoetan Euskaraldiko ikurrak eta banderak jartzeko proposamena egin zaie hala nahi duten belarriprest eta ahobiziei.
Izena emateko:
www.euskaraldia.eus
Euskaraldia batzordeetan
Euskaraldia app