Bi urtez behin egiten den ariketa sozialaren helburua da hizkuntza-ohiturak aldatu eta euskararen erabilera handitzea. Horretarako, oso garrantzitsua da euskara erabiltzeko gune erosoak sortzea. Gune horien sorreran erakunde, enpresa, elkarte zein era guztietako eragileek ekarpen garrantzitsua egin dezaketela gogoratu dute ekimenaren antolatzaileek. Urkijoren hitzetan, arlo sozioekonomikoan eragin nabarmena duten erakundeek euskararen erabilera bultzatzeko eragile garrantzitsuak eta bide-erakusleak izan daitezke; horregatik, eskerrak eman dizkie finantza-entitateetako ordezkariei beraien erakundeetan erronka berriak proposatzeko eman duten urratsarengatik.
Maiatzaren 18an zabaldu zen era guztietako entitateek Euskaraldian parte hatzeko izena emateko epea. Azaldutakoaren arabera, Euskaraldiaren bigarren edizioan izena eman zuten entitateak beraien parte hartzea berresten dabiltza. Horri lotuta, ariguneak sortzen ari diren entitateek hemen eman edo berretsi dezaketela izen-ematea. Bestalde, herritarrek irailaren 28tik aurrera ahobizi edo belarriprest roletan izena emateko edo parte hartzea berresteko aukera izango dute.
Antolataileek adierazi dutenez, Euskaraldia urrats eta lorpen ugariren gehiketa izan da aurreko edizioetan. Hirugarren edizioan ere proposamen hau egingo diete parte hartuko duten entitate eta herritarrei: euskararen erabilera areagotu eta hizkuntza-ohituretan aldaketak egiteko erronka konkretuak jar diezazkiotela euren buruari. Erronka guzti horien baturatik gizartean aldaketa eragitea da antolatzaileen helburua, hizkuntza-praktiketan eragitea.