Aitziber Argiarro Euskaraldiaren Txorierriko dinamizatzaileak azaldu duenez, Euskaraldiak kalean protagonismo txikiagoa eduki izana joera orokorra izan da eta ezin da bakarrik Txorierriri lotu. Joera hori ulertzeko, bi arrazoi nabarmendu ditu. “Alde batetik, oraindik nabariak dira pandemiaren ondorioak eta kostatzen zaigu herrigintzara hurbiltzea. Bestetik, lehen edizioak berritasuna ekarri zuen, eta horrekin batera, ilusioa; hirugarren edizio honetan, berriz, mundu guztiak jakin du Euskaraldia zer den, ez da ariketa berria izan, eta, hortaz, zailagoa da hasierako ilusio hori berreskuratzea”.
Zenbakiei begiratuta ere, ez da egon espero zen parte-hartzaileen kopurua. “Dena dela, kontuan hartu beharra dago, zenbait arrazoi tartean, pertsona batzuek ez dutela ariketan izenik eman, nahiz eta ariketan parte hartu. Orduan pertsona-kopuru hori ez dago datuetan islatuta”. Izan ere, batzuek pentsatu dute aurretik izena emanda zutenez ez zela beharrezkoa hori berrestea.
Nolanahi ere, ondorio larririk atera gabe, Argiarrok uste du ezinbestekoa dela Euskaraldiari epe luzerako ikuspuntutik heltzea. “Bidean gorabeherak izango dira. Adibidez, lehenengo edizioak ilusioa ekarri zuen; bigarrenean pandemian izan ginen; eta pentsatzen dut hirugarren edizio honetan egonkortze-prozesua hasi dugula… Beraz, garrantzitsua da ariketari etorkizuneko perspektibatik begiratzea: hau distantzia luzeko lasterketa da eta inportanteena da pixkanaka-pixkanaka gora eginez joatea”.
Bestalde, batzordeko kideek ezinbestekotzat jo dute batzordeak indartzea. “Beharrezkoa da batzordeetara jende gehiago batzea, lan handiagoa egin ahal izateko eta lagun gehiagorengana ailegatu ahal izateko. Hala ere, sasoi batean izan bada ere, Euskaraldiak ekarri du ingurua euskalduntzea”. Horri dagokionez, antolatzaileek deia egin diete belarriprestei eta ahobiziei 15 egunean egindako urratsei jarraipena emateko. Txorierriko batzordeek deia bera egin dute. “Inportantea da bakoitzak hartutako rolari eustea eta Euskaralditik sortutako harremana egonkortzea eta urtean zehar hari jarraitasuna ematea”.