Denbora librean ere itota, gehiegizko estimulazioagatik
Gai al zara 30 minutuz ezer egin gabe egoteko? Edo telefonoa hartzeko beharra izaten duzu?
Kanpoko estimuluak etengabe jasotzera ohituta gaude, eta ezinezkoa egiten zaigu ezer egin gabe egotea. Gure seme-alabek ere, gero eta estimulu gehiago behar dituzte: Bazkaltzen duten bitartean telefono bidez hitz egiten dute; eta etxerako lanak egiten dituzten bitartean bideoak ikusten dituzte. Ezaguna egiten zaizu?
Gaur egungo gaztetxoak gainestimulazioaren garaian jaio dira, eta ez dakite zelan kudeatu estimulazio falta. Hori dela-eta eskolan gero eta bideo eta jolas interaktibo gehiago erabiltzen dira, eta denbora librean gero eta ekintza gehiago ematen dizkiegu aukeran. Ez zaie gustatzen aspertzea, eta ez diegu aspertzeko aukerarik ematen.
Asperdura baloratzeko beharra
Asperdura emozio bat da, eta, funtsean, betetzen ez den garun-estimulazioaren bilaketa bat da. Erakartzen zaituen zerbaiten bila bazabiltza eta ez baduzu lortzen, frustrazio horri asperdura esaten zaio. Baina, zergatik saihesten dugu? Hain kaltegarria al da?
Aspertzen garenean gure atentzioa askatzen dugu, eta aukera ematen diogu gure garunari ideia berriak sortzeko, hau da, sormena sustatzen du. Gainera, asperdurak introspekziorako aukera ezin hobea eskaintzen digu, gure emozioekin, beldurrekin eta desioekin harremanetan jartzeko aukera. Eta ez ahaztu, garunak atseden hartzeko, beharrezkoa dela egunerokotasuneko erritmoaz askatzea eta orainaldiaz gozatzea.
Goian aipatutakoak, asperduraren onura ugarietako batzuk baino ez dira, baina nahikoak asperduraren balioa begi-bistan uzteko, ezta? Beraz, aurten, eskolaz kanpoko ekintzak aukeratzean, utzi asperduraren kontrako borroka eta kontuan hartu aspertzeko uneak izatearen abantailak.