Azoka 17:30etik aurrera izango da Agirre lehendakariaren plazan, eta laguntzeko modu bi daude: alde batetik, Bizi Zamudio elkartearen dendetara salgai ipintzeko arropa eta objektuak eramanda; eta bestetik, azokan bertan erosiz. Musika-talde batek girotuko du ekintza. Gainera, urriaren 30ean bertan, 11:00etan, Ischandia gizarte ekintzak informazio-hitzaldia egingo du Zamudiotorren eta bertan azalduko dute zertan datzan Puppyren trebakuntza; Puppy Liher eta Haizea neba-arreben laguntza-txakurra izango da. Oterok azaldu moduan, txakurra hezteko prozesuak urtebete irauten du eta 18.322 euro balio du.
“Umeak ez dira kaleko arriskuez ohartzen eta, gainera, zarata eta argiak direla-eta krisiak izan ohi dituzte kalean: haietako batek atakea badu, handik gutxira besteak ere izaten du, elkarri kutsatzen diotelako. Halako egoeretan, nik umeetako bat zaintzen dudan bitartean, txakurrak bestea zaindu ahalko luke, eta mina har dezala ekidin. Edo haietako bat korrika irteten bada, bere atzetik joan. Era berean, txakurrak lagundu ahal die eskailerak eta zintarriak jaisten ikasten, kalea zebra-pasaguneetatik gurutzatzen… Ondorioz, umeak pixkanaka-pixkanaka ikasiz joango dira noiz eta non gelditu behar diren, nondik pasatu…”, kontatu zigun amak.
Lekuetara joatea ere korapilatsua da Liherrentzat eta Haizearentzat eta txakurrak horretan ere lagunduko lieke. “Esaterako, medikuarenera joateko. Izan ere, haietako batek medikuarekin hitzordua badu, bestea ere eraman behar dut kontsultara eta txakurrak lagunduko lioke bertan lasaiago egoten, medikuak bere arreba edo bere neba artatzen duen bitartean”. Bestalde, lo egiteko orduan ere mesedegarria izango litzateke umeek laguntza-txakurra hurbil izatea. “Ezin dute atsedenik hartu eta lo egiteko orduan pertsona batekin egon behar dute denbora osoan. Lasaitzeaz gainera, txakurrak konfiantza emango lieke, apur bat bakarrik egon ahal izateko. Nire ustez, laguntza-txakurrari esker, seme-alabek lortuko lukete pixka bat autonomoagoak izatea eta pentsatzen dut hori inportantea dela, askatasun apur bat eta segurtasuna behar dutelako”.