“Bi urteren ostean, guztiok dugu Pazko jaiak beti bezala ospatzeko gogoa, eta horregatik programa oso bat landu dugu, edade guztietarako jarduerak dituena”, azaldu du Lander Aretxabaleta kultura zinegotziak. “Zuhurtziak eta osasun-egoerak markatutako bi urteren ondoren, gure helburu nagusia programa zabala diseinatzea izan da, edade eta gustu ezberdinetako herritarrek gozatzeko aukera izan dezaten. Kultura-mundua ere sano hartu dugu kontuan. Urte hauek gatzak izan dira guztiontzat eta kulturarentzat modu berezian. Aurten, gozatzeko moduko normaltasunean gaudenez, kontzertuak, txarangak eta kalejirak programatu ditugu, kultura eta alaitasuna Zamudioko kaleetara eroateko”.
Aretxabaletaren berbetan, parte hartzeko jai-egitaraua antolatu dute udalak eta jai-batzordeak. Bestalde, esan beharra dago Umeen Kontseiluarekin ere egin dutela lan, “jaien esparruan belaunaldien arteko jarduerak antolatzeko”. Txupinazoa ekainaren 3an, 19:00etan, botako dute. Ostean, kalejira eta txaranga izango dira. Agertokira Broken Izotz eta Akerbeltz taldeak igoko dira. Zapatuko ekintzak goiz-goiz hasiko dira, sukalki eta tortilla txapelketen eskutik. “Sukalkia berreskuratu dugu, bere falta sentitu da eta. Izan ere, hainbat edadetako pertsonak elkarrekin egoteko era ematen digu”. Ekainaren 4a hilabeteko lehen zapatua da eta, ohikoa denez, Nekazamudio herriko baserritarren azoka egingo da. Umeentzako puzgarriak ere izango dira goizez zein arratsaldez. “Arrakasta handia izaten dute, baina beti egoten dira edade guztietarako jarduerak, eta parte-hartze polita”. Horrela, dantzen agerraldia izango da arratsaldean, abesbatzen emanaldia eta kalejira. Gaueko 10:00etatik aurrera, Lotura, Matxinada, Iheskide eta Oxabi taldeek joko dute agertoki nagusian.
“Sukalkia berreskuratu dugu: hainbat edadetako pertsonak elkarrekin egoteko era ematen digu”
Meza egongo da domeka goizean, kalejirak eta Dj Xaiborren emanaldia. “Erromeria antolatu dugu arratsalderako: Joselu Anaiak taldea ibiliko da Sabino Arana plazan. Uste dugu edadekoei gustatuko zaien jarduera dela eta jaiarekin bat egitera gonbidatuko dituela”. Astelehenean, eta jaiak amaitzeko, meza eta kopaua izango dira goizean, eta karta txapelketa, arratsaldean. “Meza nagusiaren osteko kopaua ere egingo da, batez ere edadekoek bere falta sentitu zuten eta”.
Antolatzaileek hurrengo mezu hau helarazi nahi die herritarrei eta bisitariei. “Batez ere goza dezatela jaiez eta kulturaz; are gehiago bi urte hauen ostean. Eta Zamudio oraindik ezagutzen ez dutenei, etor daitezela, merezi izango duelako. Herritar eta bisitari guztiek gozatzeko moduko jaiak izatea espero dugu, eta pertsona guztiekiko errespetua nagusi izatea”.
“Herritar guztiek gozatzeko moduko jaiak izatea espero dugu, eta pertsona guztiekiko errespetua nagusi izatea”
Jai egitaraua
Ekainak 3, barikua
–19:00 Txupinazoa eta gozokiak, Sabino Arana plazan. Ondoren, kalejira Bertoko eta Gazte Elai taldeek girotua.
–20:00 Dunbots txaranga, herriko kaleetatik.
–23:00 Kontzertuak, Sabino Arana plazan: Broken Izotz + Akerbeltz.
Ekainak 4, zapatua
–09:00 Sukalki eta tortilla txapelketetan izena ematea.
–10:30 Nekazamudio, Agirre Lehendakaria plazan.
–11:00 Umeentzako puzgarriak, Bidekoetxe parkean.
–13:30 Tortilla eta sukalki txapelketen sariak banatzea.
–16:00 Umeentzako puzgarriak, Bidekoetxe parkean.
–18:00 Dantzen agerraldia, Hiru Bat dantza-taldearen eskutik, Agirre Lehendakaria plazan.
–19:30 Abesbatzak, San Martin elizan: Oskarbi (Gasteiz), Coro Amanecer (Gijón) eta Zamudioko Kamara Korala.
–20:00 Kalejira: Rock Kalean.
–22:00 Kontzertuak, Sabino Arana plazan: Lotura + Matxinada + Iheskide + Oxabi.
Ekainak 5, domeka
–11:00 Meza, San Martin elizan.
–11:00 Kalejira, Gazte Elai taldeak girotua.
–12:00 Kalejira, Bertokok girotua.
–12:00 Dj Xaibor, Sabino Arana plazan.
–18:00 Erromeria, Sabino Arana plazan: Joselu Anaiak.
Ekainak 6, astelehena
–12:00 Meza, San Martin elizan. Kopaua, elizpean.
–16:00 Karta txapelketa, Adintsuen Etxean.
Brigada feminista
Beste alde batetik, eta Zapata Gorriak talde feministak jakinarazi duenez, zenbait ekintza egingo dira jaietan, emakumeen kontrako erasoak aurreikusteko eta horiei erantzuna emateko. Horrela, bada, brigada feminista osatu da, eta eraso sexistarik jasanez edo ikusiz gero, bere kideengana jo daiteke, edo 633 918 561 telefono-zenbakira deitu. Brigada feministaren kideek zapi morea jantziko dute. Barikuan eta zapatuan puntu morea egongo da jai-gunean eta han informazioa eta laguntza ipiniko da herritarren eskura. Era berean, txosnetan eta kontzertuetan eraso sexisten kontrako mezuak ipiniko dira, eta herriguneko puntu beltzak identifikatu. “2019an herriko hainbeste emakumeen artean sortu genuen jaietarako protokoloa eramango da aurrera, eta bertan adostutako intentsitate baxuko edo altuko erasoen aurrean erabakiak hartuko dira”, azaldu dute. Euren hitzetan, eraso sexisten kontrako neurriak “jai-batzordearen oniritziarekin eta laguntzarekin” egingo dira.