Ia lau urte eman dituzu Athleticen presidente. Eromena handia izan da?
Tira, eromena pandemiak ekarri du: futbolak gorriak ikusi ditu, eta zer esanik ez ostalaritzak. 2020ko martxora arte, primeran nenbilen, gustatzen zitzaidana egiten nuelako. Harrezkero, San Mames itxi zuten, baita familiako bost jatetxeak ere, eta guztiok etxean gelditu behar izan genuen. Azken urteotan oso garrantzitsua izan da Zamudioko jendeak eman didan babesa eta eskerrik asko esan nahi diet.
Uzten duzun kluba hartu zenuena baino hobea da?
Bai. Presidente guztiok lau ardatz kudeatu behar ditugu: lehenengoz, Lezaman aurrerapausoak egin ditugu: Aterpe proiektuak babes handiagoa eman die adingabekoei eta UEFA erakundeak saritu gaitu horregatik. Emakumezkoen futbolak urte aldakorrak bizi izan ditu, eta Athleticek erantzun ona eman du, lehenengo hiru taldeak Estatu mailako kategorian baitaude. Hori lortzen duen klub bakarra gara; bigarrenez, Fundazioa gardenagoa eta eraginkorragoa da; hirugarrenez, Athletic marka garatu dugu: denda bat ireki dugu Guggenheim museoaren aurrean, eskailera mekanikoak jarri ditugu San Mamesen, teknologia berrien aldeko apustua egin dugu, salmentek gora egin dute...; eta laugarrenez, herri-harmailari eta estatutu berriak onartu dira.
Zergatik ez zara hauteskundeetara aurkeztu?
Pandemiak eragin ikaragarria izan du Athleticen eta ostalaritzan. Eta agintaldia bukatu baino lehen, estatutuak eta herri-harmaila aurrera atera nahi nituen. Beraz, lehentasuna horiei eman nien. Oso zaila izango zitekeen estatutuak eta herri harmaila bukatzea, eta gainera, hauteskundeak behar bezala prestatzea. Ez naiz damutzen.
Estatutu berriak eta herri-harmaila atera dituzu aurrera...
Bai. Estatutu berrien testua ausarta eta eraldatzailea da. XXI. mendean, hiru presidente saiatu gara estatutuak aldatzen eta hirugarrenean lortu egin dugu. Harmailaren inguruan poz-pozik gabiltza, datozen urteotan San Mames ordenatuago egongo delako eta horrek indartsuago egingo gaituelako. Tresna onak dira datozen urteotan kluba behar bezala kudeatzeko.
Zelan kudeatu zenuen pandemia?
Txarto pasatu dugu, klubak jarraitzaileen babesa behar duelako. Oraindik ere ez dakigu zer bizi izan dugun. Jokalariei eskerrik asko esan behar diegu, soldataren murrizketarekin aho batez bat egin zutelako. Bazkideek ere primeran jokatu zuten, kuotak kontsumoko prezioen indizearekin (KPI) batera igoko direla onartu zutelako.
Estatutuak eta herri-harmaila onartzea garaipen nagusiak izan dira?
Oso onuragarriak dira. Horretarako, hainbat lagunekin hitz egin behar izan dugu eta, elkarren artean oso desberdinak izan arren, adostu dugu proiektu biak garrantzitsuak direla. Gehiengoak lortu behar izan ditugu eta ez da erraza izan.
Zerbait utzi duzu egin barik? Akatsen bat izan duzula uste duzu?
Agian, batzuetan eskarmenturik eza adierazi dugu. Horren haritik, gai bi aipatuko nituzke: batetik, beste era batean esango niokeen agur Gaizka Garitanori, berak klubari dena eman ziolako; eta bestetik, Fernando Llorenteren inguruko eztabaida piztu genuen eta horrek kalte egin zion klubari. Beste gai batzuetan kritikak jaso ditugu (Bibiane Schulze fitxatu izana, Athleticen egun-erdiko osagaia kendu izana, jokalari batzuk Athleticetik atera izana...), baina nik uste dut ondo jokatu genuela horietan guztietan.
Zein izan da momenturik gozoena? Eta okerrena?
Okerrena aurtengo Valentziaren kontrako kanporaketa izan da. Gol bat falta zitzaigun azken lau urteotan bosgarren finala jokatzeko. Finala horretara zaletuek joateko aukera izango zuketen... Eurek batez ere merezi zuten, baina baita jokalariek eta Marcelinok ere. Gozoena, aldiz, Real Madrilen kontrako Kopako kanporaketa. Betiko jarraituko nukeen partida hori jokatzen. Izan ere, Athleticek maila ederra erakutsi zuen Europako txapeldunaren kontra. Egun berezia izan zen, Oscar de Marcos jokalariak esan zuen moduan, “ohiko futbol gaua Bilbon”.
Nolako etorkizuna dauka klubak?
Kopan, txapelketa laburretan, gustura gaude; Liga, aldiz, luze egiten zaigu. Athleticentzat gero eta zailagoa da goi-mailan bizirautea, baina erronka ederra da. Eta ez diogu horri uko egin behar. Horretarako, tresna batzuk erabili behar ditugu: profesionalizazioa, gizarte eremua eta marka bultzatu behar dira, kirol-zuzendaritza eraginkorra... Baliabide horiek ondo kudeatuz gero, haziko gara.
Gomendioren bat emango zenioke presidente berriari?
Arestian aipatutako lau ardatzak jorratuko ditu: Lezama, Fundazioa, marka eta jendearen babesa. Athleticen ezin da etiketarik egon, ez dago ez eskuinik, ez ezkerrik, Athletic garrantzitsua delako eta hori erdi-erdian dagoelako. Athletic bakarra dago eta Athleticek guztiok hartzen gaitu.
Zer deritzozu Jon Uriarteri?
Esku onetan gaude. Gainera, Valverde entrenatzaile ezin hobea da eta jokalariek ere maila ona dute. Are gehiago, jokalari gazte batzuk hasi dira agertzen eta etorkizun oparoa dute. Azken bolada honetan, normala izango balitz moduan hartu dugu jokalari gazteek Lehenengo Mailan emandako errendimendua, baina ez da hain erraza. Mantenduko ahal da! Lezaman sortutako jokalari batek 300-400 partida jokatzen baditu, oso pozgarria da, baina batez ere kluba jasangarria dela esan nahi du, gure eredua badabilela.
" Athleticen ezin da etiketarik egon; Athletic bakarra dago eta Athleticek guztiok hartzen gaitu"
Zer deritzozu Jon Uriarteri?
Esku onetan gaude. Gainera, Valverde entrenatzaile ezin hobea da eta jokalariek ere maila ona dute. Are gehiago, jokalari gazte batzuk hasi dira agertzen eta etorkizun oparoa dute. Azken bolada honetan, normala izango balitz moduan hartu dugu jokalari gazteek Lehenengo Mailan emandako errendimendua, baina ez da hain erraza. Mantenduko ahal da! Lezaman sortutako jokalari batek 300-400 partida jokatzen baditu, oso pozgarria da, baina batez ere kluba jasangarria dela esan nahi du, gure eredua badabilela.
"Lezaman sortutako jokalari batek 350 partida jokatzeak klubaren eredua badabilela esan nahi du"
Capa. "Pandemia egon arren, 2020ko udazkenean, kontratua 2023ra arte luzatzea eta soldata hobetzea proposatu genion, baina ez zuen onartu. 2021ean titularra izateari utzi zion eta 2022ko urtarrilean lagatzea pentsatu genuen, baina Capak ez zuen onartu. Gure betebeharra postu bakoitza aztertzea eta horren arabera esfortzu ekonomikoak neurtzea. Orain denok nahi dogu Capari gauzak ondo ateratzea. Athletic da gure lehentasuna eta klubaren ondarea babestu behar dugu.
Marcelino. "Entrenatzailerik onena zela uste genuen. Hautagai birekin hitz egin nuen eta gomendatu genien Marcelinok datorren denboraldian jarraitzea, Athleticentzat onena zelako. Nik gai ikusten nuen iazko emaitzak gainditzeko".
De Marcos eta Balenziaga. "Marcelino jarraituko zuela uste genuen. Hori aintzat hartuta, epe ertainean jokalari interesgarriak direla uste genuen: konpromiso itzela dute, errendimendu ona erakutsi dute... Eta horregatik berritu genituen kontratuak".