Lander Aretxabaleta, Zamudioko alkatea, pozik agertu da azokak izan duen erantzunarekin eta ekoizleei eman zaien laguntzarekin. “Zapaturako eguraldi txarra iragarrita egon arren, jende ugari hurbildu zen Zamudiora, artisauen proposamenez gozatzera, eta gero animatu ziren Puro Relajo taldearekin dantzatzera. Eta domekan pozez ikusi genuen nola azoka-esparrua jendez betetzen zen, jai-giro ederrean. Nekazaritza- eta abeltzaintza-sektoreko ekoizleak ere pozik irten ziren publikoarekin harreman zuzena izateko leihoa den hitzordu honekin”.
Zamudioko Nekazaritza eta Abeltzaintza Azoka Bizkaiko azoka garrantzitsuenetakoa da, “urtero biltzen duen jendetza handiagatik, bai lehen sektoreari ematen dion laguntzagatik”. Azokan 90 saltoki baino gehiago atondu ziren, eta bertaratutakoek kalitate bikaineko baserriko produktuak erosi ahalko ziren, hala nola, barazkiak, fruta, gazta, eztia, ogia, pastelak eta txakolina. Bestalde, Txokolate, Gozoki eta Artisautza Azokak ere hainbat pertsona bildu zituen, eta zapatuan herri-bazkaria egon zen, Gure Porrusalda eta limusin-katxopoa dastatu zirela.
Sariak
Beste aldetik, sariak ere banatu ziren domekan: Edurtxeta Atutxa, barazki-posturik onena; David Etxebarria, fruta-posturik onena eta Patxi Baskaran, gazta-posturik onena. Magalarte Zamudiok, Erdikoetxek (Lezama) eta Gozamena/Erdikoetxek txakolin onenari saria jaso zuten txakolin zuriaren, gorriaren eta beltzen kategorietan. Euskadiko Limusin Ganadu Lehiaketari dagokionez, hauek izan ziren sarituak: Mª Begoña Arruti (Oiartzun), zezen txapeldun heldua, ganadutegirik onena eta intseminazio artifizialaren bidezko animaliarik onena; Tomasa Aurora Barón, txapeldun gaztea; eta Fidel Abans ganadutegia (Orozko), behi heldurik onena. Txapelketa LORRA kooperatibak antolatzen du urtero, Bizkaiko Foru Aldundiarekin, Eusko Jaurlaritzarekin, Zamudioko Udalarekin eta BBKrekin lankidetzan. Lehiaketaren helburuak dira limusin arraza sustatzea eta zabaltzea eta arrazaren hobekuntza genetikoak jendaurrean aurkeztea.